ചിറ്റഗോങ്: ബംഗ്ലാദേശിനെതിരായ ഏകദിന പരമ്പര  ഇംഗ്ലണ്ട് സ്വന്തമാക്കി. അവസാന ഏകദിനത്തില്‍ നാലു വിക്കറ്റിനു വിജയിച്ചാണ് മൂന്നു മത്സരങ്ങളടങ്ങിയ പരമ്പര 2-1നു ഇംഗ്ലണ്ട് നേടിയത്.
ആദ്യം ബാറ്റു ചെയ്ത ബംഗ്ലാദേശ് നിശ്ചിത 50 ഓവറില്‍ ആറു വിക്കറ്റ് നഷ്ടത്തില്‍ 277 റണ്‍സെന്ന ഭേദപ്പെട്ട സ്‌കോറിലെത്തി. വിജയം തേടിയിറങ്ങിയ ഇംഗ്ലണ്ട് 47.5 ഓവറില്‍ ആറു വിക്കറ്റ് നഷ്ടത്തില്‍ 278 റണ്‍സെടുത്തു. ഡുക്കറ്റ് (63), ബില്ലിങ്‌സ് (62), സ്റ്റോക്‌സ് (47), വിന്‍സ് (32) എന്നിവരുടെ ബാറ്റിങാണ് ഇംഗ്ലീഷ് നിരയ്ക്ക് ജയമൊരുക്കിയത്.  67 റണ്‍സെടുത്ത് പുറത്താകാതെ നിന്ന മുഷ്ഫിഖര്‍ റഹീമാണ് ബംഗ്ലാ നിരയിലെ ടോപ് സ്‌കോറര്‍. സബ്ബിര്‍ റഹ്മാന്‍ (49), ഇംറുല്‍ കെയ്‌സ് (46), തമിം ഇഖ്ബാല്‍ (45) എന്നിവരും തിളങ്ങി. ഇംഗ്ലണ്ട് നിരയില്‍ ആദില്‍ റഷീദ് നാലു വിക്കറ്റുകള്‍ വീഴ്ത്തി. റഷീദാണ് കളിയിലെ താരമായത്. പരമ്പരയുടെ താരമായി ബെന്‍ സ്റ്റോക്‌സ് തിരഞ്ഞെടുക്കപ്പെട്ടു.