കേപ്ടൗണ്‍: ആസ്‌ത്രേലിയക്കെതിരായ അഞ്ചു മത്സരങ്ങളടങ്ങിയ ഏകദിന പരമ്പര ദക്ഷിണാഫ്രിക്ക തൂത്തുവാരി. അവസാന മത്സരത്തില്‍ 31 റണ്‍സിനു വിജയിച്ചാണ് പരമ്പര ദക്ഷിണാഫ്രിക്ക 5-0നു സ്വന്തമാക്കിയത്. ആദ്യം ബാറ്റു ചെയ്ത ദക്ഷിണാഫ്രിക്ക നിശ്ചിത 50 ഓവറില്‍ എട്ടു വിക്കറ്റ് നഷ്ടത്തില്‍ 327 റണ്‍സെടുത്തപ്പോള്‍ ആസ്‌ത്രേലിയന്‍ പോരാട്ടം 48.2 ഓവറില്‍ 296 റണ്‍സില്‍ അവസാനിച്ചു. കൂറ്റന്‍ വിജയ ലക്ഷ്യത്തിലേക്ക് ബാറ്റു വീശിയ ഓസീസിനായി 136 പന്തില്‍ 173 റണ്‍സെടുത്ത് ഓപണര്‍ ഡേവിഡ് വാര്‍ണര്‍ വിജയ പ്രതീക്ഷ നല്‍കിയെങ്കിലും മറ്റൊരാളം പിന്തുണയ്ക്കാനില്ലാതെ പോയി. 48ാം ഓവറില്‍ വാര്‍ണര്‍ റണൗട്ടായതോടെ അവരുടെ ചെറുത്തുനില്‍പ്പും അവസാനിച്ചു. മിച്ചല്‍ മാര്‍ഷ് (35) ട്രാവിസ് ഹെഡ്ഡ് (35) ആരോണ്‍ ഫിഞ്ച് (19) എന്നിവര്‍ മാത്രമാണ് ഓസീസ് നിരയില്‍ രണ്ടക്കം കടന്നത്. ദക്ഷിണാഫ്രിക്കക്കായി അബ്ബോട്ട്, സ്റ്റെയ്ന്‍, റബാഡ എന്നിവര്‍ രണ്ടു വീതം വിക്കറ്റെടുത്തു.
 ടോസ് നേടി ബാറ്റിങ് തിരഞ്ഞെടുത്ത ദക്ഷിണാഫ്രിക്കയ്ക്ക് റെയ്‌ലി റോസ്സോയുടേയും (122), ജീന്‍ പോള്‍ ഡുമിനിയുടേയും (73) മികവിലാണ് 327 റണ്‍സിലെത്തിയത്. വാര്‍ണര്‍ കളിയിലെ താരമായി. ഒരു സെഞ്ച്വറിയും രണ്ട് അര്‍ധ ശതകങ്ങളും നേടിയ റോസ്സോ പരമ്പരയുടെ താരമായി.