കയ്പമംഗലം: അറബിക്കടലിലെ തിരമാലകളെ പോലെ ആര്‍ത്തിരമ്പി ഇടതു കോട്ടകളില്‍ പോലും ആവേശം തീര്‍ത്ത് യു.ഡി.എഫ് പടിഞ്ഞാറന്‍ മേഖല പദയാത്ര. യു.ഡി.എഫ് സ്ഥാനാര്‍ഥി എം.ടി മുഹമ്മദ് നഹാസിന്റെ നേതൃത്വത്തിലാണ് അഴീക്കോട് ജെട്ടി മുതല്‍ അസ്മാബി കോളജ് വരെ പദയാത്ര സംഘടിപ്പിച്ചത്. ഇടതു കോട്ടകളില്‍ പോലും യു.ഡി.എഫിന്റെ സംഘ ശക്തിയും വിജയാരവവും മുഴക്കുന്നതായിരുന്നു നൂറ്കണക്കിന് യു.ഡി.എഫ് പ്രവര്‍ത്തകര്‍ പങ്കെടുത്ത വാദ്യമേളങ്ങളുടെ അകമ്പടിയോടെ അണിനിരന്ന തീരദേശ പദയാത്ര. ഒട്ടും ആവേശം അണമുറിയാതെയാണ് പദയാത്ര അസ്മാബി കോളജ് പരിസരത്ത് സമാപിച്ചത്. ഡി.സി.സി പ്രസിഡന്റ് പി.എ മാധവന്‍ എം.എല്‍.എയാണ് പദയാത്ര ഉദ്ഘാടനം ചെയ്തത്. യു.ഡി.എഫിന്റെ ശക്തി തെളിയിക്കുന്ന പ്രചാരണ ജാഥ ഇടതു നേതൃത്വത്തിനിടയില്‍ ഇതിനകം തന്നെ ചര്‍ച്ചയായിട്ടുണ്ട്. ജാഥക്ക് ആവേശമായി പ്രകൃതി ചാറ്റല്‍ മഴ നല്‍കി അനുഗ്രഹിച്ചത് പ്രവര്‍ത്തകര്‍ക്ക് ആവേശം നല്‍കി. സ്ഥാനാര്‍ഥി എം.ടി മുഹമ്മദ് നഹാസ് നേതൃത്വം നല്‍കിയ തീരദേശ പദയാത്രയില്‍ യു.ഡി.എഫ് നേതാക്കളായ പി.ബി താജുദ്ദീന്‍, സി.സി ബാബുരാജ്, സി.എസ്‌രവീന്ദ്രന്‍, കെ.എഫ് ഡൊമിനിക്, പി.എം.എ ജബാര്‍, കെ.കെ അഫ്‌സല്‍ തുടങ്ങിയവര്‍ നേതൃത്വം നല്‍കി. വഴിയോരങ്ങളില്‍ സ്‌നേഹാശംസകളുമായി കാത്തു നിന്ന ആവേശം കാത്തു സൂക്ഷിക്കുന്ന പഴയകാല യു.ഡി.എഫ് പ്രവര്‍ത്തകര്‍ അവശതകള്‍ വക വെക്കാതെ എത്തിയത് ജാഥയുടെ മാറ്റ് കൂട്ടി.