മനാമ: ബഹ്‌റൈനില്‍ മൂന്നര കിലോ ഹാഷിഷുമായി ഒരാള്‍ പിടിയിലായതായി ഡയറക്ടര്‍ ജനറല്‍ ഓഫ് ക്രിമിനല്‍ ഇന്‍വെസ്റ്റിഗേഷന്‍ ആന്റ് ഫോറന്‍സിക് സയന്‍സ് അറിയിച്ചു. ഇയാളുടെ പേരുവിവരങ്ങള്‍ അധികൃതര്‍ പുറത്തുവിട്ടിട്ടില്ല.

21,000 ദിനാര്‍ (ഏകദേശം 38 ലക്ഷം രൂപ) വില മതിയ്ക്കുന്ന മൂന്നര കിലോയിലേറെ തൂക്കം വരുന്ന ഹാഷിഷുമായാണ് ഇയാള്‍ പിടിയിലായത്. രഹസ്യ വിവരത്തെ തുടര്‍ന്ന് ബഹ്‌റൈനിലുള്ള ഇയാളുടെ താമസസ്ഥലത്ത് പൊലിസ് നടത്തിയ തിരച്ചിലിലാണ് മയക്കുമരുന്ന് കണ്ടെത്തിയത്. പബ്ലിക് പ്രോസിക്യൂഷന്‍ വാറന്റോട് കൂടിയാണ് ഇയാളെ അറസ്റ്റ് ചെയ്തത്. കേസ് പബ്ലിക് പ്രോസിക്ക്യൂഷന് കൈമാറിയതായും, നിയമനടപടികള്‍ നടന്നു വരികയാണെന്നും ഡയറക്ടര്‍ ജനറല്‍ അറിയിച്ചു.