തിരുവനന്തപുരം: അഴിമതി തടയാന്‍ കാര്യക്ഷമമായ നടപടികള്‍ അനിവാര്യമാണെന്ന് ഭരണ പരിഷ്‌കാര കമ്മിഷന്‍. ചെയര്‍മാന്‍ വി.എസ്.അച്യുതാനന്ദന്റെ അധ്യക്ഷതയില്‍ ചേര്‍ന്ന ആദ്യയോഗത്തിലാണ് അഴിമതിക്കെതിരായ നിലപാട് വ്യക്തമാക്കിയത്.
അഴിമതി നിര്‍മാര്‍ജനം ചെയ്യാന്‍ നിലവിലുള്ള വിജിലന്‍സ് സംവിധാനത്തെ പുനഃസംഘടിപ്പിക്കണം. ശക്തവും കാര്യക്ഷമവുമായ ഒരു വിജിലന്‍സ് നിയമത്തിന്റെ അനിവാര്യത ബോദ്ധ്യപ്പെടുന്നുണ്ട്. വിജിലന്‍സിനെ സ്വതന്ത്ര അന്വേഷണ ഏജന്‍സിയാക്കുന്നതിനെക്കുറിച്ച് ആലോചിക്കേണ്ടതുണ്ടെന്നും ഭരണപരിഷ്‌കാര കമ്മിഷന്‍ പത്രക്കുറിപ്പില്‍ വ്യക്തമാക്കി.
പൊതു പണം കൈകാര്യം ചെയ്യുന്ന എല്ലാ സ്ഥാപനങ്ങളിലും ആഭ്യന്തര വിജിലന്‍സ് സംവിധാനം, വിജിലന്‍സിലേക്ക് ഉദ്യോഗസ്ഥരെ തെരഞ്ഞെടുക്കുന്നതിനായി നിയമപരമായ ഒരു സ്‌ക്രീനിങ് കമ്മിറ്റി, പരിശീലനത്തിനായി വിജിലന്‍സ് അക്കാദമി തുടങ്ങി വിജിലന്‍സിനെ കാര്യക്ഷമമാക്കുന്ന നിര്‍ദേശങ്ങള്‍ക്ക് കമ്മിഷന്‍ മുന്‍കൈയടുക്കും. അഴിമതിക്കാരുടെ അവിഹിത സ്വത്ത് കണ്ടുകെട്ടുന്നതിന് ഇന്ന് ഫലപ്രദമായ നിയമമില്ലാത്തതും പ്രശ്‌നമാണ്. ബിനാമികളില്‍ നിക്ഷേപിക്കുന്ന അവിഹിത സമ്പാദ്യമടക്കം കണ്ടുകെട്ടാന്‍ നിയമനിര്‍മാണമടക്കമുള്ള സാദ്ധ്യതകള്‍ പരിശോധിക്കുമെന്ന് കമ്മിഷന്‍ വ്യക്തമാക്കി.
ലോകായുക്ത, ഓംബുഡ്‌സ്മാന്‍ സംവിധാനങ്ങള്‍ മെച്ചപ്പെടുത്തണമെന്നും കമ്മിഷന്‍ നിര്‍ദേശിക്കുന്നു. നിലവിലുള്ള വിവരാവകാശ നിയമത്തെ ശക്തിപ്പെടുത്താന്‍ കമ്മിഷന്‍ നടപടികള്‍ സ്വീകരിക്കും.
ഭരണഭാഷ മലയാളമാക്കിയെങ്കിലും ഇപ്പോഴും പൂര്‍ണമായി നടപ്പാക്കപ്പെടുന്നില്ല. ഇതിനായി സാങ്കേതിക കാര്യങ്ങള്‍ കൂടുതല്‍ മെച്ചപ്പെടുത്താന്‍ കമ്മിഷന്‍ ശ്രമിക്കും. വിദ്യാഭ്യാസ രംഗത്ത് പാഠ്യപദ്ധതി, പാഠപുസ്തകം, അധ്യാപക നിയമനം, വിദ്യാഭ്യാസത്തിന്റെ സാമൂഹ്യ ഉള്ളടക്കം, ഉന്നതവിദ്യാഭ്യാസരംഗം എന്നീ വിഷയങ്ങള്‍ പ്രത്യേകം പരിഗണിക്കുമെന്നും കമ്മിഷന്‍ ചൂണ്ടിക്കാട്ടി.