തൊടുപുഴ: നാട്ടുകാര്‍ സംഘടിപ്പിച്ച് രൂപികരിച്ച വികസന സമിതിയുടെ നിയമപോരാട്ടത്തിന്റെ ഫലയമായി മൂലമറ്റം -പതിപ്പളളി- ഉലുപ്പൂണി റോഡിന് 9.38 കോടിയുടെ ഭരണാനുമതി ലഭിച്ചു.  ഹൈക്കോടതിയില്‍ സമര്‍പ്പിച്ച ഹര്‍ജിയില്‍ ജസ്റ്റിസ് എ. മുഹമ്മദ് മുഷ്താഖിന്റെ ഉത്തരവിനെ തുടര്‍ന്ന് സര്‍ക്കാര്‍ കനിഞ്ഞത്.
40 വര്‍ഷം മുമ്പ് നാട്ടുകാര്‍ വെട്ടിത്തുറന്ന ഈ വഴി തേക്കടി, വാഗമണ്‍, പീരുമേട്, കുരിശുമല എന്നിവടങ്ങളിലേക്കുളള എളുപ്പവഴിയാഷ്.  നൂറ് ശതമാനം ആദിവാസികള്‍ താമസിക്കുന്ന പതിപ്പളളി മേമുട്ടം വഴി കടന്നുപോകുന്ന ഈ റോഡ് മറ്റ് സമീപ റോഡുകളെ അപേക്ഷിച്ച് ദൂരക്കുറവും അപകട സാധ്യതയില്ലാത്തതുമാണ്. മാത്രമല്ല പാലങ്ങളോ, കലുങ്കുകളോ, ചപ്പാത്തുകളോ നിര്‍മ്മിക്കേണ്ട ആവശ്യമില്ല. റോഡ് പണി പൂര്‍ത്തയായാല്‍ തൊടുപുഴയില്‍ നിന്നും കട്ടപ്പനയ്ക്കുളള ദൂരം 90 ല്‍ നിന്നും 70 കിലോമീറ്ററായി ചുരുങ്ങും. കഴിഞ്ഞ സര്‍ക്കാരിന്റെ കാലത്ത്  ഇടുക്കി എം.പി. ആയിരുന്ന പി.ടി തോമസ് മുഖ്യമന്ത്രിക്ക് കൊടുത്ത നിവേദനത്തിന്റെ അടിസ്ഥാനത്തില്‍ ബജറ്റില്‍പ്പെടുത്തി ഇന്‍വസ്റ്റിഗേഷന്‍ സര്‍വ്വേയ്ക്ക് പൊതുമരാമത്ത് വകുപ്പില്‍ നിന്ന് 15 ലക്ഷം രൂപാ അനുവദിച്ചിരുന്നു. സര്‍വ്വേ നടപടികള്‍ പൂര്‍ത്തിയാക്കി വിശദമായ എസ്റ്റിമേറ്റും റിപ്പോര്‍ട്ടും റോഡിന്റെ അലൈന്‍മെന്റും അംഗീകരിച്ച് ഭരണാനുമതിക്കായി സര്‍ക്കാരിന് സമര്‍പ്പിച്ചിരുന്നു. എന്നാല്‍ ധനകാര്യവകുപ്പില്‍ നിന്ന് അനുമതി ലഭിക്കാത്തതുമൂലം പൊതുമരാമത്ത് വകുപ്പില്‍ നിന്ന് ഭരണാനുമതികിട്ടിയില്ല.
ചില രാഷ്ട്രീയ നേതാക്കളേയും ജനപ്രതിനിധികളേയും തദ്ദേശവാസികള്‍ സമീപിച്ചെങ്കിലും ആദിവാസി കോളനി ആയതിനാല്‍ അവഗണിക്കുകയാണുണ്ടായതെന്ന് ഭാരവാഹികള്‍ പതസമ്മേളനത്തില്‍ അറിയിച്ചു. 2014-2015 സാമ്പത്തിക വര്‍ഷത്തില്‍ വീണ്ടും ഭരണാനുമതി കിട്ടുന്നതിന് ഇടുക്കി ഡി.സി.സി. പ്രസിഡന്റ് റോയി കെ. പൗലോസ് മുഖ്യമന്ത്രിക്ക് നിവേദനം കൊടുക്കുകയും അതിന്റെ അടിസ്ഥാനത്തില്‍ ബഡ്ജറ്റില്‍പ്പെടുത്തുകയും ചെയ്തു. എന്നാല്‍ ചില പ്രാദേശീക നേതാക്കളുടെ സമ്മര്‍ദ്ദത്തെ തുടര്‍ന്ന് അന്നത്തെ ധനകാര്യമന്ത്രി കെ. എം. മാണി വീണ്ടും അനുമതി നിഷേധിച്ചു. ഇതിനിടെ അഞ്ച് വര്‍ഷം മുമ്പ് മേമുട്ടം ഭാഗത്ത് ഉരുള്‍പ്പൊട്ടി റോഡ് പൂര്‍ണ്ണമായി തകര്‍ന്നു.
എം.എല്‍. എ.യേയും, എം.പി.യേയും മറ്റ് തൃതല പഞ്ചായത്ത് ജനപ്രതിനിധികളേയും തദ്ദേശ വാസികള്‍ സമീപിച്ചെങ്കിലും ആരും തിരിഞ്ഞ് നോക്കിയില്ല. ഇതിനെ തുടര്‍ന്ന് തദ്ദേശ വാസികള്‍ ആദിവാസി കോണ്‍ഗ്രസ് ജില്ലാ സെക്രട്ടറി എം.ഡി. ദേവദാസിന്റെ നേതൃത്വത്തില്‍ യോഗം ചേര്‍ന്ന് റോഡ് വികസന സമിതി രൂപീകരിച്ചു. സമിതി ചെയര്‍മാന്‍ എം.ഡി. ദേവദാസ്, സെക്രട്ടറി കെ.കെ, വിജയന്‍ എന്നിവര്‍  അഭിഭാഷകരായ പി.എം. മനോജ്, എസ്. റസൂല്‍, വി.ആര്‍ അരുണ്‍. എന്നിവര്‍ മുഖേന നടത്തിയ നിയമപേരാട്ടത്തിനൊടുവിലാണ് സര്‍ക്കാര്‍ പ്രത്യക അനുമതി നല്‍കി ഉത്തരവായത്.  പതിപ്പളളി, ഉളുപ്പൂണി, പീരുമേട്, കട്ടപ്പന തുടങ്ങിയ മേഖലയിലെ കാര്‍ഷിക ഉത്പ്പന്നങ്ങള്‍ പ്രധാന വിപണനകേന്ദ്രമായ കൊച്ചിയില്‍ എത്തിക്കാന്‍ ഏറ്റവും എളുപ്പവഴിയാണിത്.
പത്രസമ്മേളനത്തില്‍ ചെയര്‍മാന്‍ എം.ഡി. ദേവദാസ്, ഉൂരുമൂപ്പന്‍ പി.ജി. ജനാര്‍ദ്ദനന്‍, ഇടുക്കി ബ്ലോക്ക് കോണ്‍ഗ്രസ് കമ്മറ്റി സെക്രട്ടറി. റ്റി. കെ. ശങ്കരന്‍, ആദിവാസി കോണ്‍ഗ്രസ് ജില്ലാ വൈസ് പ്രസിഡന്റ് വി.കെ. മോഹനന്‍, ആദിവാസി ഗോത്രസഭ ജില്ലാകമ്മറ്റി മെമ്പര്‍ സി.എസ്സ്. ജിയേഷ്, ആദിവാസി കോണ്‍ഗ്രസ് ജില്ലാ സെക്രട്ടറി പുഷ്പ വിജയന്‍ എന്നിവര്‍ പങ്കെടുത്തു.