കാസര്‍കോട്: പട്ടിക്കാട് ജാമിഅ: നൂരിയ്യ: അറബ്ബിയ്യയുടെ ജൂനിയര്‍ കോളജായ ചെങ്കള പാണക്കാട് സയ്യിദ് മുഹമ്മദലി ശിഹാബ് തങ്ങള്‍ ദഅ്‌വ കോളജിന്റെ ശിലാസ്ഥാപനവും പൊതു സമ്മേളനവും 16നു നടക്കുമെന്ന് സംഘാടകസമിതി ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
16നു 12നു ചെങ്കള ഹൈദ്രൂസ് ജുമാമസ്ജിദിനു സമീപം പാണക്കാട് സ്വാദിഖലി ശിഹാബ് തങ്ങള്‍ ശിലാസ്ഥാപനം നടത്തും. സമസ്ത ജനറല്‍ സെക്രട്ടറി പ്രൊഫസര്‍ കെ ആലിക്കുട്ടി മുസലിയാര്‍ അധ്യക്ഷനാവും. അലി തങ്ങള്‍ കുമ്പോള്‍ പ്രാര്‍ഥനയും ചെങ്കള അബ്ദുല്ല ഫൈസി സ്വാഗതവും പറയും. ത്വാഖാ അഹ്മ്മദ് മുസലിയാര്‍, യു.എം അബ്ദു റഹ്മാന്‍ മൗലവി, ചെര്‍ക്കളം അബ്ദുല്ല, എം.എല്‍.എമാരായ എന്‍.എ നെല്ലിക്കുന്ന്, പി.ബി അബ്ദുറസാഖ്, എന്‍.എ അബൂബക്കര്‍ ഹാജി, മെട്രോ മുഹമ്മദ്, ഡോ. ഖത്തര്‍ ഇബ്രാഹിം ഹാജി കളനാട് തുടങ്ങിയവര്‍ സംസാരിക്കും. മുന്നൂറോളം വിദ്യാര്‍ഥികള്‍ക്കു താമസിച്ചു പഠനം നടത്തുന്ന രീതിയിലുള്ള ബഹുനില കെട്ടിടമാണു നിര്‍മിക്കുന്നത്.
വാര്‍ത്താസമ്മേളനത്തില്‍ ചെങ്കളം അബ്ദുല്ല ഫൈസി, എം.എ അബൂബക്കര്‍ ഹാജി, എം.എം മുഹമ്മദ് കുഞ്ഞി ഹാജി, എം.എ.എച്ച് മഹ്മൂദ്, ഹാശിം അരിയില്‍, ജംസീര്‍ ചെങ്കള എന്നിവര്‍ പങ്കെടുത്തു.