തൃക്കരിപ്പൂര്‍: വലിയപറമ്പ് പഞ്ചായത്ത് ഭരണ സമിതി യോഗത്തില്‍ നിന്നു കോണ്‍ഗ്രസ് അംഗങ്ങള്‍ വിട്ടു നിന്നു.  യു.ഡി.എഫ് ഭരിക്കുന്ന 13 അംഗ ഭരണസമിതിയില്‍ യു.ഡി.എഫില്‍ നിന്നു രണ്ടു പേര്‍ മാത്രമാണ് യോഗത്തിനെത്തിയത്. സി.പി.എമ്മില്‍ നിന്ന് ആറു പേരും യോഗത്തില്‍ പങ്കെടുത്തു. മുസ്‌ലിം ലീഗിനു നാലും കോണ്‍ഗ്രസിന് മൂന്നും അംഗങ്ങളുമാണുളളത്.  
അജണ്ട യു.ഡി.എഫ് യോഗത്തില്‍ ചര്‍ച്ച ചെയ്യാത്തതാണു യോഗത്തില്‍ നിന്ന് അംഗങ്ങള്‍ വിട്ടു നില്‍ക്കന്‍ കാരണമെന്നാണ് സൂചന.
അഞ്ചാം വാര്‍ഡിലുള്ള ഒരു സ്ഥാപനത്തിലെ ജീവനക്കാരിയെ മാറ്റുന്നതു സംബന്ധിച്ച തര്‍ക്കമാണു കോണ്‍ഗ്രസ് അംഗങ്ങളും പഞ്ചായത്ത് പ്രസിഡന്റും തമ്മില്‍ നിലനില്‍ക്കുന്നതെന്നാണ് വിവരം.
ഈ ജീവനക്കാരിയെ മാറ്റണമെന്ന് കോണ്‍ഗ്രസ് അംഗങ്ങള്‍ ആവശ്യപ്പെട്ടിരുന്നു. ഇത് അംഗീകരിക്കാന്‍ പ്രസിഡന്റ് തയാറാവാത്തതാണു നിലവിലെ പ്രതിസന്ധിക്ക് കാരണം.
കഴിഞ്ഞ മൂന്നിനു ചേര്‍ന്ന ബോര്‍ഡ് യോഗം പ്രസിഡന്റ് ഉള്‍പ്പെടെ മൂന്നു ലീഗ് അംഗങ്ങള്‍ വിദേശത്തു പോവുകയും യോഗത്തിനു നടപടി ക്രമം പാലിച്ചില്ലെന്നുമാരോപിച്ചു ഇടതുപക്ഷ അംഗങ്ങള്‍ ബഹിഷ്‌കരിച്ചിരുന്നു.