ന്യൂഡല്‍ഹി: ധൈര്യമുണ്ടെങ്കില്‍ അധോലോക കുറ്റവാളി ദാവൂദ് ഇബ്രാഹിമിനെ പിടിക്കൂടണമെന്ന് ദാവൂദിന്റെ അടുത്ത അനുയായിയായ ഛോട്ടാ ഷക്കീലിന്റെ വെല്ലുവിളി. ദാവൂദിന്റെ പാകിസ്താനിലെ വീടിന്റെ ദൃശ്യങ്ങള്‍ പ്രമുഖ ചാനല്‍ പുറത്തുവിട്ടതിന് പിന്നാലെയാണ് ഛോട്ടാ ഷക്കീല്‍ വെല്ലുവിളിയുമായി രംഗത്തെത്തിയത്.
'നിങ്ങള്‍ എന്തുകൊണ്ട് ദാവൂദിനെ പിടികൂടുന്നില്ല. നിങ്ങള്‍ പറയുന്നതുപോലെ അദ്ദേഹം പാകിസ്താനിലുണ്ടെങ്കില്‍ പോയി പിടികൂടണം.' ഛോട്ടാ ഷക്കീല്‍ പറഞ്ഞു.ദാവൂദ് പാകിസ്താനിലാണെന്ന വാദവും ഷക്കീല്‍ തള്ളിക്കളഞ്ഞു. കറാച്ചിയില്‍ എത്രയോ ദാവൂദ് ഇബ്രാഹിംമാരുണ്ട്. നിങ്ങള്‍ ഉദ്ദേശിക്കുന്നയാള്‍ യഥാര്‍ഥ ദാവൂദ് അല്ലെന്നും ഷക്കീല്‍ ഫോണിലൂടെ അറിയിച്ചു.
ദക്ഷിണ കറാച്ചിയില്‍ ദാവൂദിന്റെ വീടിന്റെ ദൃശ്യങ്ങളെന്ന് വ്യക്തമാക്കിയുള്ള വിഡിയോ പുറത്തുവന്നിരുന്നു. ദാവൂദിന്റെ വിലാസം, ഡി 3, ബ്ലോക്ക് 14, ക്ലിഫ്റ്റണ്‍, കറാച്ചി എന്നാണെന്ന് ചാനല്‍ പുറത്തുവിട്ട റിപ്പോര്‍ട്ടില്‍ പറയുന്നു. കറാച്ചിയിലെ സമ്പന്നര്‍ താമസിക്കുന്ന മേഖലയാണ് ക്ലിഫ്റ്റണ്‍.എന്നാല്‍ ദാവീദ് പാകിസ്താനില്‍ ഇല്ലെന്നും തങ്ങള്‍ക്ക് അതിനെപറ്റി അറിയില്ലെന്നുമാണ് പാകിസ്താന്‍ പറയുന്നത്. 1993ലെ മുംബൈ സ്‌ഫോടന പരമ്പര കേസില്‍ ഇന്ത്യ അന്വേഷിക്കുന്ന പിടികിട്ടാപ്പുള്ളിയാണ് ദാവൂദ് ഇബ്രാഹിം.