ഊട്ടി: വീട് കുത്തിത്തുറന്ന് 28 പവന്‍ സ്വര്‍ണം കവര്‍ന്നു. ഊട്ടിയിലെ അമല്‍രാജിന്റെ വീട്ടിലാണ് മോഷണം നടന്നത്. വീടിന്റെ അടുക്കള വാതില്‍ കുത്തിത്തുറന്ന് വീട്ടിനുള്ളിലെ അലമാരയില്‍ സൂക്ഷിച്ചിരുന്ന 28 പവന്‍ സ്വര്‍ണാഭരണമാണ് കവര്‍ന്നത്. കുന്നൂര്‍ അറുവങ്കാട് വെടിമരുന്ന് ഫാക്ടറി ജീവനക്കാരനായ അമല്‍രാജും ഭാര്യയും ജോലിക്ക് പോയ സമയത്തായിരുന്നു സംഭവം.
ഇതുസംബന്ധിച്ച് ഇയാള്‍ ഊട്ടി പൊലിസില്‍ പരാതി നല്‍കി. ഊട്ടി സി.ഐ ശിവകുമാര്‍, എസ്.ഐ പ്രവീണ എന്നിവരുടെ നേതൃത്വത്തിലുള്ള പൊലീസ് സംഘം സ്ഥലത്തെത്തി പരിശോധന നടത്തി. വിരലടയാള വിദഗ്ധരും പൊലിസ് നായയും പരിശോധന നടത്തി. എസ്.ഐ പ്രവീണയുടെ നേതൃത്വത്തിലുള്ള സ്‌പെഷ്യല്‍ സംഘം അന്വേഷണം ആരംഭിച്ചിട്ടുണ്ട്.