സുല്‍ത്താന്‍ ബത്തേരി: വയനാട് ജില്ലയെ വരള്‍ച്ചബാധിത ജില്ലയില്‍ ഉള്‍പ്പെടുത്താത്തതില്‍ വ്യാപക പ്രതിഷേധം. കഴിഞ്ഞ ദിവസം ചേര്‍ന്ന സംസ്ഥാന വരള്‍ച്ചാനിരീക്ഷണ സെല്ലാണ് ഈ കാലവര്‍ഷത്തില്‍ സംസ്ഥാനത്ത് ഏറ്റവും കുറവ് മഴ ലഭിച്ച ജില്ലയെ വരള്‍ച്ചാബാധിത ജില്ലാപട്ടികയില്‍ നിന്നും ഒഴിവാക്കിയത്. കൊടും വരള്‍ച്ചയിലേക്ക് അനുദിനം നീങ്ങികൊണ്ടിരിക്കുന്ന വയനാട് ജില്ലയെ പട്ടികയില്‍ നിന്നും ഒഴിവാക്കിയ നടപടി അംഗീകരിക്കാനാവില്ലാണ് ജനം പറയുന്നത്. സംഭവത്തിലുള്ള പ്രതിഷേധം മുഖ്യമന്ത്രിയേയും കൃഷി വകുപ്പ് മന്ത്രിയേയും അറിയച്ചതായും ഐ.സി ബാലകൃഷ്ണന്‍ എം.എല്‍.എ പറഞ്ഞു. വയനാട് ജില്ലയെ വരള്‍ച്ചാബാധിത ജില്ലയായി ആദ്യഘട്ട പട്ടികയില്‍ നിന്നും ഒഴിവാക്കിയത് ജില്ലയ്ക്ക് വന്‍തിരിച്ചടിയാണ് ഉണ്ടാക്കിയിരിക്കുന്നത്.
കാലാവസ്ഥാ വ്യതിയാനം കൊണ്ട്് ജില്ല വന്‍പ്രതിസന്ധിയിലേക്ക് നീങ്ങുമ്പോള്‍ ഉത്തരവാദിത്തപെട്ടവരെ പലതവണ അറിയിച്ചെങ്കിലും സംസ്ഥാന വരള്‍ച്ചാ നിരീക്ഷണസെല്‍ ശുപാര്‍ശ ചെയ്ത പട്ടികയില്‍ വയനാട് ജില്ലയെ ഉള്‍പ്പെടുത്താത്തത് ഖേദകരമാണന്നും എം.എല്‍.എ പറഞ്ഞു. നിലവില്‍ സംസ്ഥാന വരള്‍ച്ചാ നിരീക്ഷണസെല്‍ തൃശൂര്‍, പാലക്കാട്, എറണാകുളം, പത്തനംതിട്ട, ഇടുക്കി ജില്ലകളെയാണ് പട്ടികയില്‍ ഉള്‍പെടുത്തിയിരിക്കുന്നത്.
ഈ ജില്ലകളില്‍ എല്ലാംതന്നെ വയനാടിനെ അപേക്ഷിച്ച് മഴ കൂടുതല്‍ ലഭിച്ചിരുന്നു. കര്‍ണാടകയോട് ചേര്‍ന്ന് കിടക്കുന്ന പുല്‍പ്പള്ളി, മുള്ളന്‍കൊല്ലി പഞ്ചായത്തുകളില്‍ ഇപ്പോള്‍തന്നെ വരള്‍ച്ച രൂക്ഷമായിട്ടുണ്ട്.