തിരുവനന്തപുരം: ഇ.പി ജയരാജന്‍ രാജിവച്ചതുകൊണ്ടു പ്രശ്‌നം തീരില്ലെന്ന് ബി.ജെ.പി സംസ്ഥാന ജനറല്‍ സെക്രട്ടറി എം.ടി രമേശ്. മുഖ്യമന്ത്രി അറിയാതെയാണു നിയമനങ്ങള്‍ നടന്നതെന്നു വിശ്വസിക്കാനാവില്ല. നിയമന കാര്യത്തില്‍ മുഖ്യമന്ത്രിയുടെ പങ്കാളിത്തം പകല്‍ പോലെ വ്യക്തമാണ്. അതിനാല്‍ വിജിലന്‍സ് അന്വേഷണ പരിധിയില്‍ മുഖ്യമന്ത്രിയുടെ ഓഫിസിനേയും ഉള്‍പ്പെടുത്തണം. ജയരാജന്റെ രാജി മഹാകാര്യമായി ഉയര്‍ത്തിപ്പിടിക്കുന്ന സി.പി.എം നിലപാടു പരിഹാസ്യമാണ്. ഗത്യന്തരമില്ലാതെയാണു ജയരാജന്‍ രാജിവച്ചത്. ആരോപണം ഉയര്‍ന്നപ്പോള്‍ മുതല്‍ വ്യാപക പ്രതിഷേധം ഉണ്ടായെങ്കിലും ജയരാജനെ സംരക്ഷിക്കുന്ന നിലപാടാണു പാര്‍ട്ടിയും മുഖ്യമന്ത്രിയും സ്വീകരിച്ചത്. എന്നാല്‍ ആര്‍ക്കും രക്ഷപ്പെടുത്താനാകാത്തവിധം കുരുക്കു മുറുകിയപ്പോള്‍ രാജിവക്കേണ്ടി വന്നതാണ്. 100 ദിവസത്തിനുള്ളില്‍ ഒരു മന്ത്രിക്കു രാജിവക്കേണ്ടിവന്നതോടെ അഴിമതിയുടെ കാര്യത്തില്‍ യു.ഡി.എഫുമായി എല്‍.ഡി.എഫിന് വ്യത്യാസമില്ലെന്നു തെളിഞ്ഞു. ഇ.പി ജയരാജനെതിരായ വാര്‍ത്ത പുറത്തുവരരുതെന്ന ചിന്തമൂലമാണു വിജിലന്‍സ് കോടതിയില്‍ മാധ്യമങ്ങളെ അക്രമിച്ചത്. അക്രമത്തിന് പിന്നില്‍ അഭിഭാഷകരുടെ വേഷം ധരിച്ച സി.പി.എം ആജ്ഞാനുവര്‍ത്തികളാണ്. കോടതിയില്‍ നിന്നു മാധ്യമങ്ങളെ ആട്ടിപ്പായിക്കുന്നതിന് പിന്നില്‍ രാഷ്ട്രീയ അജണ്ടയുണ്ടെന്നും അദ്ദേഹം പറഞ്ഞു.