കൊല്‍ക്കത്ത:രഞ്ജി ട്രോഫി ക്രിക്കറ്റില്‍ ഹിമാചല്‍ പ്രദേശിനെതിരേ കേരളത്തിന് അപ്രതീക്ഷിത തോല്‍വി. ഒന്നാമിന്നിങ്‌സില്‍ ലീഡ് നേടുമെന്ന് കരുതിയ കേരളത്തിനെതിരേ വാലറ്റത്തെ കൂട്ടുപിടിച്ച് നേടിയ പോരാട്ടവും മികച്ച ബൗളിങും ചേര്‍ന്നപ്പോള്‍ ആറു വിക്കറ്റിന്റെ ജയമാണ് ഹിമാചല്‍ പ്രദേശ് സ്വന്തമാക്കിയത്.
എട്ടിന് 184 റണ്‍സുമായി തകര്‍ച്ചയെ നേരിട്ട ഹിമാചല്‍ സുമിത് വര്‍മ(50)യുടെ തകര്‍പ്പന്‍ ഇന്നിങ്‌സ് ലീഡിലേക്ക് നയിക്കുകയായിരുന്നു. ആദ്യ ഇന്നിങ്‌സില്‍ 261 റണ്‍സിന് ടീം പുറത്തായെങ്കിലും നിര്‍ണായകമായ 13 റണ്‍സിന്റെ ലീഡ് സ്വന്തമാക്കാന്‍ ഹിമാചലിന് സാധിച്ചു. കേരളത്തിനായ ജലജ് സക്‌സേന അഞ്ചു വിക്കറ്റെടുത്തു.  കെ.എസ് മോനിഷ് രണ്ടും ഇഖ്ബാല്‍ അബ്ദുല്ല, സന്ദീപ് വാര്യര്‍ എന്നിവര്‍ ഓരോ വിക്കറ്റുമെടുത്തു.  എന്നാല്‍ മറുപടി ബാറ്റിങിനിറങ്ങിയ കേരളത്തിന് ഹിമാചലിന്റെ ബൗളിങിന് മുന്നില്‍ പിടിച്ചു നില്‍ക്കാനായില്ല.
രോഹന്‍ പ്രേം(20) ബേസില്‍ തമ്പി(20) എന്നിവരാണ്  ടീമിന്റെ ഉയര്‍ന്ന സ്‌കോറര്‍മാര്‍. സഞ്ജു സാംസണ്‍(1) സച്ചിന്‍ ബേബി(1) ഭവീന്‍ താക്കര്‍(16) എന്നിവര്‍ നിരാശപ്പെടുത്തി. അഞ്ചു വിക്കറ്റെടുത്ത ഗുര്‍വീന്ദര്‍ സിങാണ് കേരളത്തിനെ തകര്‍ത്തത്. മായങ്ക് ദാഗര്‍ മൂന്നും റിഷി ധവാന്‍ രണ്ടും വിക്കറ്റെടുത്തു.
103 റണ്‍സിന്റെ വിജയലക്ഷ്യവുമായിറങ്ങിയ ഹിമാചലിന് 46 റണ്‍സിനിടെ മൂന്നുവിക്കറ്റ് നഷ്ടമായെങ്കിലും പരസ് ദോഗ്ര(27*) സുമിത് വര്‍മ(7*) റോബിന്‍ ബിസ്റ്റ്(20) എന്നിവര്‍ ചേര്‍ന്ന് ടീമിനെ വിജയത്തിലേക്ക് നയിക്കുകയായിരുന്നു. കെ.എസ് മോനിഷ് കേരളത്തിനായി മൂന്നുവിക്കറ്റെടുത്തു. ജയത്തോടെ മത്സരത്തില്‍ ആറു പോയിന്റ് സ്വന്തമാക്കാനും ഹിമാചലിന് സാധിച്ചു.