വടക്കാഞ്ചേരി: ആരോഗ്യ വകുപ്പ് മന്ത്രി കെ.കെ ശൈലജയുടെ ഓഫിസ് നിയന്ത്രിക്കുന്നത് ക്രിമിനല്‍ കേസില്‍ പ്രതികളായവരാണെന്ന് എന്‍.ജി.ഒ അസോസിയേഷന്‍ സംസ്ഥാന ജനറല്‍ സെക്രട്ടറി എന്‍.കെ ബെന്നി പറഞ്ഞു. മുളങ്കുന്നത്ത്കാവ് മെഡിക്കല്‍ കോളജ് അടക്കമുള്ള തന്ത്ര പ്രധാന  കേന്ദ്രങ്ങളില്‍ നടക്കുന്ന സ്ഥലം മാറ്റങ്ങളും, മറ്റ് ചട്ടവിരുദ്ധ പ്രവര്‍ത്തനങ്ങളുമൊക്കെ ഇതിന്റെ ഭാഗമാണ്. മെഡിക്കല്‍ കോളജ് എംപ്ലോയീസ് സഹകരണ സംഘം പ്രസിഡന്റുമായ കെ.എന്‍ നാരായണനെ എല്ലാ മാനദണ്ഡങ്ങളും കാറ്റില്‍ പറത്തി കൊല്ലം പാരിപ്പിള്ളി മെഡിക്കല്‍ കോളജിലേക്ക് സ്ഥലം മാറ്റിയത് ഇതിന് തെളിവാണെന്നും ബെന്നി കുറ്റപ്പെടുത്തി. നടപടിയില്‍ പ്രതിഷേധിച്ച് മെഡിക്കല്‍ കോളജ് പ്രിന്‍സിപ്പാള്‍ ഓഫിസിന് മുന്നില്‍ നടന്ന പ്രതിഷേധ ധര്‍ണ ഉദ്ഘാടനം ചെയ്തു സംസാരിക്കുകയായിരുന്നു ബെന്നി. ബ്രാഞ്ച് പ്രസിഡന്റ് കെ.പി ഗിരീഷ് അധ്യക്ഷനായി. എം.ഒ ഡെയ്‌സണ്‍, പി.വി റോയ്, ടി.ജി രഞ്ജിത്ത്, ആനന്ദ രാജ്, എ.എസ് നദീറ, ആത്മ രാജ്, പി.രാമചന്ദ്രന്‍, പി.വി കുഞ്ഞുമുഹമ്മദ് പ്രസംഗിച്ചു.