ന്യൂഡല്‍ഹി: ഡല്‍ഹിയിലെ അലിപൂരിലുണ്ടായ വാഹനാപകടത്തില്‍ അമിറ്റി സര്‍വകലാശാലയിലെ മൂന്ന് വിദ്യാര്‍ഥികള്‍ മരിച്ചു. ഏഴു വിദ്യാര്‍ഥികള്‍ക്ക് പരുക്കേറ്റു. രണ്ടാം വര്‍ഷ ബി.ടെക് വിദ്യാര്‍ഥികളായ ശിക്കാര്‍, ഊജ്വല്‍, രാജേഷ് എന്നിവരാണ് മരിച്ചത്.

ഹരിയാനയിലെ മുര്‍ത്താലിലേക്കു പോവുകയായിരുന്ന ഇവരുടെ കാര്‍ ഇഷ്ടിക കയറ്റിയ ട്രാക്ടറിലേക്ക് ഇടിച്ചു കയറുകയായിരുന്നു. ഇടിയുടെ ആഘാതത്തില്‍ അമിത വേഗതയിലായിരുന്ന കാറില്‍ നിന്നു വിദ്യാര്‍ഥികള്‍ തെറിച്ചു വീഴുകയായിരുന്നു. അപകടത്തില്‍ കാര്‍ പൂര്‍ണമായും തകര്‍ന്നിട്ടുണ്ട്.

ട്രാക്ടര്‍ ഡ്രൈവര്‍ അപകടത്തിനു ശേഷം ഒളിവിലാണ്. പരുക്കേറ്റ ഏഴുപേരെയും ആശുപത്രിയില്‍ പ്രവേശിപ്പിച്ചിരിക്കുകയാണ്. ഇവരില്‍ രണ്ടു പേരുടെ നില ഗുരുതരമാണ്.