ഇടവെട്ടി: നിറയെ ലോഡുമായി ഇറക്കത്തില്‍ നിയന്ത്രണം വിട്ടു വന്ന മിനി ലോറി ഹോട്ടലിലേക്ക് പാഞ്ഞുകയറി. ആളുകള്‍ ഓടിമാറിയതിനാല്‍ ദുരന്തം ഒഴിവായി. ഇന്നലെ വൈകിട്ട് 5.30 ഓടെ ഇടവെട്ടി പഴയ പോസ്‌റ്റോഫീസ് കവലയിലാണ് സംഭവം.
അബ്ദുല്‍ കരീമിന്റെ ഉടമസ്ഥതയിലുളള ഇടവെട്ടി റസ്‌റ്റോറന്റിലേക്കാണ് ലോറി ഇടിച്ചുകയറിയത്. തെക്കുംഭാഗം - ഇടവെട്ടി റോഡിലെ കുത്തനെയുളള ഇറക്കത്തില്‍ നിയന്ത്രണം വിട്ട് പാഞ്ഞെത്തിയ ലോറി തൊടുപുഴ - വെളളിയാമറ്റം റോഡ് കുറുകെ കടന്ന് എതിര്‍വശത്തുളള ഹോട്ടലിലേക്ക് പാഞ്ഞുകയറുകയായിരുന്നു.
ആ സമയം റോഡില്‍ വാഹനങ്ങള്‍ ഉണ്ടായിരുന്നില്ല. സമീപത്തെ ഓട്ടോ സ്റ്റാന്റും ശൂന്യമായിരുന്നു.
ലോറി പാഞ്ഞുവരുന്നത് കണ്ടവര്‍ അലറി വിളിച്ചതോടെ റോഡില്‍ നിന്നവര്‍ ഓടിമാറുകയായിരുന്നു. ബ്രേക്ക് നഷ്ടപ്പെട്ടതാണ് അപകടകാരണം. കടയുടെ മുന്‍വശത്തെ ചാര്‍ത്തും ചില്ലുകളും തകര്‍ന്നു. രാമപുരത്ത് നിന്നും കോഴിവളവുമായി പന്നിമറ്റത്തേക്ക് പോകുകയായിരുന്നു ലോറി.