അരീക്കോട്: കോളജ് തെരഞ്ഞെടുപ്പുമായി ബന്ധപ്പെട്ട് അരീക്കോട് സുല്ലമുസ്സലാം സയന്‍സ് കോളജ് ക്യാമ്പസ് പരിസരത്ത് സ്ഥാപിച്ച എം എസ് എഫിന്റെ കൊടി തോരണങ്ങള്‍ സാമൂഹ്യ വിരുദ്ധര്‍ നശിപ്പിച്ചതായി പരാതി. ശനിയാഴ്ച രാത്രി രണ്ടിനു ബൈക്കിലെത്തിയ മൂവര്‍ സംഘമാണ് അക്രമം നടത്തിയതെന്ന് സ്ഥാപനത്തിലെ സെക്യൂരിറ്റി ജീവനക്കാരന്‍ പറഞ്ഞു.
ക്യാമ്പസിന്റെ ഗേറ്റില്‍ സ്ഥാപിച്ച സി സി ടി വിയില്‍ അക്രമികളുടെ ചിത്രം പതിഞ്ഞിട്ടുണ്ട്. ഇതു പൊലിസ് പരിശോധിച്ചു വരികയാണ്.
ക്യാമ്പസില്‍ വിജയമുറപ്പിച്ചു പ്രവര്‍ത്തനവുമായി മുന്നേറുന്ന എം എസ് എഫിന്റെ കൊടി തോരണങ്ങള്‍ നശിപ്പിച്ചവരെ ഉടന്‍ പിടികൂടണമെന്ന് ഏറനാട് മണ്ഡലം എം എസ് എഫ് കമ്മിറ്റി ആവശ്യപ്പെട്ടു.