കാളികാവ്: ചോക്കാട് ഗ്രാമപഞ്ചായത്തില്‍ ഒ.ഡി.എഫ് പ്രഖ്യാപനം നടന്നു. 277 കുടുംബങ്ങള്‍ക്കു ശുചി മുറിയില്ലാത്തതിനാല്‍ തുറസായ സ്ഥലത്തു മല മൂത്ര വിസര്‍ജനം ചെയ്യുന്നതായി കഴിഞ്ഞ വര്‍ഷത്തെ സര്‍വേയില്‍ കണ്ടെത്തിയിരുന്നു. ഗ്രാമപഞ്ചായത്തില്‍ ആരോഗ്യ പ്രശ്‌നം കണക്കിലെടുത്തു മുഴുവന്‍ കുടുംബങ്ങള്‍ക്കും ശുചി മുറി നിര്‍മിച്ചു നല്‍കിയിട്ടുള്ളത്. ശുചിത്വ മിഷനും ഗ്രാമ പഞ്ചായത്തും ചേര്‍ന്നാണ് ഇതിനുള്ള തുക വകയിരുത്തിയിട്ടുള്ളത്.
ഗ്രാമ പഞ്ചായത്ത് പ്രസിഡന്റ് ഷാഹിന ഗഫൂര്‍ നിര്‍വഹിച്ചു. ഗ്രാമ പഞ്ചായത്ത് വൈസ് പ്രസിഡന്റ് ആനിക്കോട്ടില്‍ ഉണ്ണികൃഷ്ണന്‍ അധ്യക്ഷനായി. ബി.ഡി.ഒ കേശവദാസ്, ഗ്രാമ പഞ്ചായത്ത് സെക്രട്ടറി സിദ്ദീഖ് വടക്കന്‍, കാളികാവ് ബ്ലോക്ക് പഞ്ചായത്തംഗങ്ങളായ പൈനാട്ടില്‍ അശ്‌റഫ്, കെ.പി. ഹൈദരലി തുടങ്ങിയവര്‍ പ്രസംഗിച്ചു.