മലപ്പുറം: കാലിക്കറ്റ് സര്‍വകലാശാല കഴിഞ്ഞവര്‍ഷം നടത്തിയ ബി കോം പരീക്ഷയിലെ കൂട്ടത്തോല്‍വി പരിശോധിച്ച സര്‍വകലാശാല ഫലം പ്രസിദ്ധീകരിക്കാത്തതു വിദ്യാര്‍ഥികളുടെ ബിരുദാനന്തര ബിരുദ പ്രവേശനം നഷ്ടമാക്കും. തൃശൂര്‍ സെന്റ് തോമസ് കോളജില്‍ പരീക്ഷയെഴുതിയ 102 കുട്ടികള്‍ക്കാണ് ബി കോം ആറാം സെമസ്റ്റര്‍ പരീക്ഷയില്‍ കൂട്ടത്തോല്‍വിയുണ്ടായത്.
സംഭവം വിവാദമായതോടെ കൂട്ടത്തോല്‍വിയുടെ കാരണം അന്വേഷിക്കാന്‍ കമ്മിഷനെ നിയോഗിക്കുകയും കമ്മിഷന്‍ മാസങ്ങള്‍ക്കുമുമ്പു റിപ്പോര്‍ട്ട് സമര്‍പ്പിക്കുകയും ചെയ്തു. എന്നാല്‍ തുടര്‍ നടപടിയൊന്നുമുണ്ടായില്ല. വിദ്യാര്‍ഥികള്‍ പരാതിയുമായി രംഗത്തെത്തിയതോടെ അടുത്ത 22നു നടക്കുന്ന സിന്‍ഡിക്കേറ്റ് യോഗത്തില്‍ ഇതുസംബന്ധിച്ചു തീരുമാനമുണ്ടാകുമെന്ന് അറിയിക്കുകയായിരുന്നു. സിന്‍ഡിക്കേറ്റ് യോഗത്തിന്റെ അംഗീകാരത്തിനുശേഷമേ ഫലം പ്രസിദ്ധീകരിക്കുകയുള്ളൂ. എന്നാല്‍ അടുത്ത 20നാണു പി ജി പ്രവേശനത്തിനുള്ള സമയം അവസാനിക്കുന്നത്. സിന്‍ഡിക്കേറ്റിന്റെ അംഗീകാരം ലഭിച്ചാലും ഫലം പ്രസിദ്ധീകരിക്കാന്‍ വീണ്ടും സമയം നീളും. പ്രവേശനം നിര്‍ത്തി രണ്ടു ദിവസം കഴിഞ്ഞാണ് സിന്‍ഡിക്കേറ്റ് തീരുമാനമെന്നതിനാല്‍ 102 വിദ്യാര്‍ഥികള്‍ക്ക് ഒരു വര്‍ഷം നഷ്ടമാകും.
സിന്‍ഡിക്കേറ്റ് തീരുമാനം വരുന്നതുവരെ പിജി പ്രവേശനനടപടി തുടരണമെന്നു കേരള പാരലല്‍ കോളജ് അസോസിയേഷന്‍ സംസ്ഥാന പ്രസിഡന്റ് പി.ടി മൊയ്തീന്‍ ആവശ്യപ്പെട്ടു. ഈ ആവശ്യമുന്നയിച്ച് അസോസിയേഷന്‍ സംസ്ഥാന ഭാരവാഹികള്‍ ഇന്ന് വൈസ്ചാന്‍സലര്‍ക്കും പരീക്ഷാ കണ്‍ട്രോളര്‍ക്കും പരാതി നല്‍കും