കൊണ്ടോട്ടി: ഇഷ്ടസ്ഥാനാര്‍ഥിക്ക് വോട്ട് ചെയ്യാന്‍ അവര്‍ ആവേശത്തോടെ നാട്ടിലെത്തി. വളരണം കേരളം, തുടരണം യു.ഡി.എഫ് എന്നെഴുതിയ പച്ച നിറത്തിലുള്ള വസ്ത്രമണിഞ്ഞാണ് അബൂദബിയില്‍ നിന്നുള്ള 50 കെ.എം.സി.സി പ്രവര്‍ത്തകര്‍ ഇന്നലെ കരിപ്പൂരില്‍ വിമാനമിറങ്ങിയത്.
രാവിലെ 8.45നാണ് ഇത്തിഹാദ് എയര്‍വേയ്‌സ് വിമാനത്തില്‍ പ്രവാസി വോട്ടര്‍മാര്‍ എത്തിയത്. തെരഞ്ഞെടുപ്പ് പ്രചാരണത്തിന്റെ അവസാനദിനങ്ങളില്‍ പങ്കാളികളാവാന്‍ കഴിഞ്ഞതിലെ സന്തോഷത്തിലായിരുന്നു മുഴുവന്‍ പേരും.
തനിച്ചെത്തിയവരും കുടുംബത്തോടെ നാട്ടിലേക്ക് മടങ്ങിയവരും ഇന്നലെ വന്നവരില്‍ ഉള്‍പ്പെടും. താനൂര്‍, തിരൂരങ്ങാടി, കോട്ടക്കല്‍, തവനൂര്‍, പെരിന്തല്‍മണ്ണ, വേങ്ങര മണ്ഡലങ്ങളിലുള്ള കെ.എം.സി.സി പ്രവര്‍ത്തകരാണ് ഒരുമിച്ചുവന്നവരില്‍ അധികവും. എല്ലാവരും സ്വന്തം ചെലവില്‍ വിമാന ടിക്കറ്റെടുത്താണ് നാട്ടിലെത്തിയത്.
പ്രവാസികള്‍ക്ക് വേണ്ടി ഒട്ടേറെ കാര്യങ്ങള്‍ ചെയ്ത യു.ഡി.എഫ് സര്‍ക്കാര്‍ വീണ്ടും അധികാരത്തില്‍ വരണമെന്ന ആഗ്രഹം കൊണ്ടാണ് വോട്ടുചെയ്യാന്‍ നാട്ടിലെത്തിയതെന്ന് അബൂദബി കെ.എം.സി.സി നേതാക്കളായ ഷുക്കൂറലി കല്ലുങ്ങല്‍, ഹിദായത്തുള്ള വേങ്ങര, അബുഹാജി കളപ്പാട്ടില്‍ എന്നിവര്‍ പറഞ്ഞു. ഇന്നും നാളേയും പതിനാറിനും ഒട്ടേറെപ്പേര്‍ വരാനുണ്ടെന്നും അവര്‍ പറഞ്ഞു. നാട്ടിലെ കെ.എം.സി.സി പ്രവര്‍ത്തകര്‍ പ്രവാസി വോട്ടര്‍മാരെ സ്വീകരിച്ചു.