ആലുവ: ചാലക്കുടി മണ്ഡലത്തിലെ 14 വിദ്യാലയങ്ങളില്‍ സ്മാര്‍ട്ട് പദ്ധതി നടപ്പിലാക്കുമെന്ന് ഇന്നസെന്റ് എം.പി. ഓരോ അസംബ്ലി മണ്ഡലത്തിലും രണ്ട് സ്‌കൂള്‍ വീതമാണ് പദ്ധതിയായി തെരെഞ്ഞെടുക്കുക. ഒരു കോടി രൂപയാണ് ഈ പദ്ധതിയ്ക്കായി ചിലവഴിക്കുക. ചാലക്കുടി മണ്ഡലത്തില്‍ ടൂറിസം സര്‍ക്യൂട്ട് പദ്ധതി നടപ്പാക്കാനും തീരുമാനമായതായി എം.പി. അറിയിച്ചു.
കേന്ദ്ര സര്‍ക്കാരിന്റെ സ്വദേശ് ദര്‍ശന്‍ പദ്ധതിയില്‍പ്പെടുത്തി കാലടി മുതല്‍ അതിരപ്പിള്ളി വരെ ഉള്‍പ്പെടുത്തിയായിരിക്കും ടൂറിസം പദ്ധതി.
തീര്‍ഥാടക കേന്ദ്രങ്ങളും, ടൂറിസം കേന്ദ്രങ്ങളും ഉള്‍പ്പെടുത്തിയുള്ള രണ്ടുതരം പദ്ധതികളാണ് ഉദ്ദേശിക്കുന്നത്. ഇതില്‍ സര്‍ക്കാര്‍ അനുമതി നല്‍കുന്ന പദ്ധതിയായിരിക്കും നടപ്പിലാക്കുക. ഇതിനായി 50 കോടി രൂപയാണ് പ്രാഥമിക ചിലവായി കണക്കാക്കുന്നതെന്നും എം.പി. അറിയിച്ചു.
സംസ്ഥാനത്തെ ജാതി കര്‍ഷകരുടെ പ്രശ്‌നങ്ങള്‍ക്ക് പരിഹാരമായി ജാതിക്കയുടെ വിവിധ ഉല്‍പ്പന്നങ്ങള്‍ക്കായുള്ള പഠന ഗവേഷണ കേന്ദ്രം നക്ക്‌ചെക്ക് പാര്‍ക്ക് കാലടിയില്‍ ആരംഭിക്കുവാനും തീരുമാനമായതായും എം.പി. അറിയിച്ചു. മണ്ഡലത്തില്‍ നടപ്പിലാക്കുന്ന വികസന പ്രവര്‍ത്തനങ്ങള്‍ക്കായി സോഷ്യല്‍ ഓഡിറ്റിംഗ് നടപ്പിലാക്കും. സംസ്ഥാനത്ത് ആദ്യമായിട്ടാണ് ഇത്തരത്തില്‍ സോഷ്യല്‍ ഓഡിറ്റിംഗ് നടപ്പിലാക്കുന്നതെന്ന് അദ്ദേഹം പറഞ്ഞു.