മുവാറ്റുപുഴ: നിയോജക മണ്ഡലത്തിലെ അതിരൂക്ഷമായ കുടിവെള്ള ക്ഷാമത്തിന് പരിഹാരം കാണാതെ എല്‍ദോ എബ്രാഹാം എം.എല്‍.എ ഉത്തരവാദിത്വത്തില്‍ നിന്നും ഒളിച്ചോട്ടം നടത്തുകയാണന്ന് ഡി.സി.സി ജനറല്‍ സെക്രട്ടറി പി.പി എല്‍ദോസ് ആരോപിച്ചു.
ഉയര്‍ന്ന പ്രദേശങ്ങളിലും, വെള്ളം ലഭിക്കാത്ത സ്ഥലങ്ങളിലും വേനല്‍ കാലത്ത് ടാങ്കര്‍ ലോറികളില്‍ സര്‍ക്കാര്‍ ചിലവില്‍ വെള്ളമെത്തിക്കുകയായിരുന്നു മുന്‍ കാല ഘട്ടത്തില്‍ ചെയ്തിരുന്നത്. എന്നാല്‍ ജലവിതരണം സന്നദ്ധ സംഘടനകളെ ഏല്‍പ്പിച്ച് സ്വന്തം ഉത്തരവാദിത്വത്തില്‍ നിന്നം ഒളിച്ചോട്ടം നടത്താനാണ് എം.എല്‍.എയുടെ തീരുമാനം.
പെരിയാര്‍വാലി, എം.വി.ഐ.പി കനാലുകള്‍ അറ്റകുറ്റപണി നടക്കാത്തതും കനാലുകള്‍ ശുചീകരിക്കുന്നതിന് നടപടികള്‍ സ്വീകരിക്കാത്തതും മൂലം കനാലുകളില്‍ വെള്ളം തുറന്ന് വിടാന്‍ കഴിയാതെ വന്നിരിക്കുകയാണ്. കനാലുകളിലൂടെ വെള്ളമെത്തിയാല്‍ താഴ്ന്ന പ്രദേശങ്ങളിലെ കുടിവെള്ള ക്ഷാമത്തിന് പരിഹാരമാകും. അടിയന്തിരമായി കനാലുകള്‍ നന്നാക്കി ജലവിതരണം ആരംഭിക്കാതെയും, ഉയര്‍ന്ന പ്രദേശങ്ങളില്‍ ടാങ്കര്‍ ലോറികളില്‍ ജലം വിതരണം ചെയ്യാതെ കുടിവെള്ള ക്ഷാമം പരിഹരിക്കാന്‍ കഴിയില്ല. ഏത് വിഷയത്തിലും യോഗം നടത്തി വാര്‍ത്ത സൃഷ്ടിക്കലല്ലാതെ സ്വയം ചേയ്യേണ്ട കാര്യങ്ങള്‍ ചെയ്യാന്‍ എം.എല്‍.എ തയ്യാറാകുന്നില്ലെന്നും എല്‍ദോസ് കുറ്റപെടുത്തി. അതിരൂക്ഷമായ കുടിവെള്ള ക്ഷാമത്തിന് ഉടന്‍ പരിഹാരം കണ്ടില്ലെങ്കില്‍ അതിശക്തമായ സമരപരിപാടികള്‍ ആരംഭിക്കുമെന്നും അദ്ദേഹം പറഞ്ഞു.