കൊച്ചി: യുവാക്കള്‍ക്കിടയില്‍ കഞ്ചാവ് വില്‍പന നടത്തിയിരുന്നയാള്‍ അര കിലോ കഞ്ചാവുമായി മുളവുകാട് പൊലിസിന്റെ പിടിയിലായി. മുളവുകാട് സ്വദേശി പോത്തടി വീട്ടില്‍ റോബിന്‍ പീറ്റര്‍(19) ആണ് പിടിയിലായത്. കമ്പം തേനി ഭാഗത്ത് നിന്നുമാണ് ഇയാള്‍ സ്ഥിരമായി കഞ്ചാവ് വാങ്ങിക്കുന്നത്.
കൊച്ചിയില്‍ നിന്നും രാത്രിയിലുള്ള ദീര്‍ഘദൂര ബസിന് കമ്പത്തെത്തുന്ന ഇയാള്‍ അതിരാവിലെയുള്ള ബസില്‍ കഞ്ചാവുമായി തിരിച്ചുവരാറാണ് പതിവ്. ഒരു കിലോയോളം വരുന്ന കഞ്ചാവ് പാക്കുകളായി ഇടനിലക്കാരന്‍ ഇയാള്‍ക്ക് കമ്പത്ത് എത്തിച്ചു നല്‍കും.
പരിശോധന ഒഴിവാക്കാനാണ് പുലര്‍ച്ചെയുള്ള സമയം തെരഞ്ഞെടുത്തതെന്ന് പ്രതി പൊലിസിനോട് പറഞ്ഞു.
വീട്ടിലെത്തി ചെറിയ പാക്കറ്റുകളിലാക്കിയാണ് ഇയാള്‍ വില്‍പന നടത്തുന്നത്. നഗരത്തിലെ സ്‌കൂളുകളിലും മറ്റും പഠിക്കുന്ന കുട്ടികള്‍ ഉള്‍പ്പെടെയുള്ള ചെറുപ്പക്കാര്‍ കഞ്ചാവിനായി ഇയാളെ സമീപിക്കാറുണ്ട്.
ആവശ്യക്കാര്‍ ഫോണില്‍ വിളിക്കുമ്പോള്‍ എവിടെ വരണമെന്ന് ഇയാള്‍ നിര്‍ദേശിക്കും. തുടര്‍ന്ന് ബൈക്കില്‍ ആവശ്യക്കാര്‍ക്ക് കഞ്ചാവ് എത്തിച്ചു നല്‍കും. കഴിഞ്ഞ ഒരു മാസമായി പ്രതി നഗരത്തിലെ വിവധ സ്ഥലങ്ങളില്‍ കഞ്ചാവ് വിറ്റുവരുന്നു. ഇയാള്‍ ഉപയോഗിക്കുന്ന ബൈക്ക് മറ്റൊരാളുടെ പേരിലുള്ളതാണെന്നും പൊലിസ് പറഞ്ഞു.
കൊച്ചിയില്‍ മയക്ക്മരുന്ന് ഉപയോഗം വ്യാപകമാണെന്ന പരാതിയെ തുടര്‍ന്ന് ഡി.സി.പി അരുള്‍ ആര്‍ കൃഷ്ണയുടെ നിര്‍ദേശാനുസരണം എറണാകുളം അസി. കമ്മിഷണര്‍ കെ ലാല്‍ജി, സെന്‍ട്രല്‍ സി.ഐ അനന്തലാല്‍ എന്നിവരുടെ നേതൃത്വത്തില്‍ പ്രത്യേക സ്‌ക്വാഡ് തന്നെ സിറ്റിയില്‍ രൂപീകരിച്ചിട്ടുണ്ട്.
മുളവുകാട് പൊലിസ് സ്റ്റേഷന്‍ സബ് ഇന്‍സ്‌പെക്ടര്‍ പി.ആര്‍ സുനു, സി.പി.ഒമാരായ ഷിഹാബ്, സനീഷ് രൂപേഷ് എന്നിവരടങ്ങിയ പൊലിസ് സംഘമാണ് പ്രതിയെ അറസ്റ്റ് ചെയ്തത്.