ഒഡന്‍സെ: റിയോ ഒളിംപിക്‌സ് ബാഡ്മിന്റണില്‍ വെള്ളി നേടി ഇന്ത്യയുടെ അഭിമാന താരമായ പി.വി സിന്ധു അന്താരാഷ്ട്ര പോരാട്ടങ്ങള്‍ക്ക് വീണ്ടും ഇറങ്ങുന്നു. ഒളിംപിക്‌സിനു ശേഷം ഒന്നര മാസത്തോളമായി മത്സര രംഗത്തു നിന്നു താത്കാലികമായി വിട്ടുനിന്ന സിന്ധു നാളെ ആരംഭിക്കുന്ന ഡെന്‍മാര്‍ക് ഓപണ്‍ സൂപ്പര്‍ സീരീസ് പ്രീമിയര്‍ ബാഡ്മിന്റണ്‍ ടൂര്‍ണമെന്റിലാണ് മത്സരിക്കാനിറങ്ങുന്നത്. നാളെ ആദ്യ റൗണ്ടില്‍ ചൈനീസ് താരം ഹി ബിങ്ജിയോയാണ് സിന്ധുവിന്റെ എതിരാളി.
ഇന്ത്യന്‍ പുരുഷ താരങ്ങളായ സായ് പ്രണീത്, എച്.എസ് പ്രാണോയ്, പി കശ്യപ് എന്നിവരും ഇവിടെ മത്സരിക്കാനിറങ്ങുന്നുണ്ട്. അതേസമയം പ്രതീക്ഷയുള്ള മറ്റൊരു താരമായ കെ ശ്രീകാന്ത് മുട്ടിനേറ്റ പരുക്കിനെ തുടര്‍ന്നു മത്സരത്തില്‍ നിന്നു പിന്മാറി.