കണ്ണൂര്‍:സര്‍ക്കാര്‍ ആശുപത്രികളിലേക്ക് മരുന്ന് വിതരണത്തില്‍ ഗണ്യമായി കുറവു വരുത്താന്‍ ആരോഗ്യവകുപ്പിന്റെ 'വാക്കാല്‍' നിര്‍ദേശം. ജില്ലാ മെഡിക്കല്‍ ഓഫിസര്‍ മുഖേന എല്ലാ ആശുപത്രി സൂപ്രണ്ടുമാര്‍ക്കുമാണ് നിര്‍ദേശം നല്‍കിയിട്ടുള്ളത്.
ഇതുപ്രകാരം അടുത്തവര്‍ഷം ആശുപത്രികളില്‍ മരുന്ന് ക്ഷാമം രൂക്ഷമാകും. ദിവസങ്ങള്‍ക്കു മുമ്പാണ് സൂപ്രണ്ടുമാര്‍ക്ക് നിര്‍ദേശമെത്തിയത്. സര്‍ക്കാര്‍ ഉത്തരവ് പുറപ്പെടുവിക്കാതെ ആരോഗ്യ വകുപ്പ് നേരിട്ട് 'രഹസ്യനിര്‍ദേശം'നല്‍കുകയായിരുന്നു.സാധാരണ നിലയില്‍ ആവശ്യപ്പെടുന്ന മരുന്നിന്റെ അളവ് കഴിഞ്ഞ മൂന്ന് വര്‍ഷം ഉപയോഗിച്ച മരുന്നിന്റെ ആനുപാതികം കണക്കാക്കിയാണ് വിതരണം ചെയ്യാറുള്ളത്. എന്നാല്‍ ആവശ്യപ്പെടുന്ന മരുന്ന് മിക്ക ആശുപത്രികള്‍ക്കും ലഭിക്കാറില്ല.
ഇതു പരിഹരിക്കാന്‍ കൂടുതല്‍ ആവശ്യപ്പെടുന്നതും പതിവാണ്. എങ്കിലും വര്‍ഷാവസാനത്തോടെ മരുന്ന് തികയാത്ത സാഹചര്യമുണ്ടാകാറുണ്ട.്ണ്ടണ്ട എന്നാല്‍ പുതിയ നിര്‍ദേശം വരുന്നതോടെ വന്‍ മരുന്ന് ക്ഷാമമാണ് സര്‍ക്കാര്‍ ആശുപത്രികളെ കാത്തിരിക്കുന്നത്. കഴിഞ്ഞ കാലങ്ങളില്‍ 400 കോടിയുടെ മരുന്നിനാണ് ആരോഗ്യ വകുപ്പ് ഓര്‍ഡര്‍ നല്‍കിയതെങ്കില്‍ ഇക്കുറി 300 കോടിയായി ചുരുക്കാനുള്ള നീക്കത്തിന്റെ ഭാഗമാണ് പുതിയ നിര്‍ദേശമെന്നാണ് ബന്ധപ്പെട്ടവര്‍ നല്‍കുന്ന സൂചന.
ഇതിന്റെ ആദ്യപടിയാണ് ജില്ലാ മെഡിക്കല്‍ ഓഫിസര്‍മാര്‍ക്കുള്ള നിര്‍ദേശം. 2017 ന്റെ അവസാനം  സര്‍ക്കാര്‍ ആശുപത്രികളില്‍ രൂക്ഷമായ മരുന്നു ക്ഷാമം നേരിടുമെന്നും ഇതുമായി ബന്ധപ്പെട്ട് രംഗത്തുവരാനും കെ.ജി.എം.ഒ തീരുമാനിച്ചിട്ടുണ്ട്. അതേസമയം, കുറഞ്ഞ വിലയ്ക്കു ലഭിക്കുന്ന വേദന സംഹാരികളും പ്രഷര്‍, ഷുഗര്‍ തുടങ്ങിയവയ്ക്കുള്ള അവശ്യമരുന്നുകളും പുതിയ പട്ടികയില്‍ നിന്നു മാറ്റി പകരം വിലകൂടിയ കമ്പനികളുടെ മരുന്നുകള്‍ ലഭ്യമാക്കാനും നീക്കം നടക്കുന്നുണ്ട്.
ഇതോടെ സര്‍ക്കാര്‍ ആശുപത്രികളിലെത്തുന്ന സാധാരണ രോഗികള്‍ക്ക് മരുന്നുകള്‍ പുറത്തു നിന്നു വാങ്ങേണ്ട അവസ്ഥയുണ്ടാവും.