കോഴിക്കോട്: കെ.എസ്.ആര്‍.ടി.സി ഡിപ്പോയിലെ വര്‍ക്ക്‌ഷോപ്പ് ജീവനക്കാരനായ അന്‍സര്‍ സൂഫിയുടെ ചിത്രങ്ങളുടെയും ശില്‍പ്പങ്ങളുടെയും പ്രദര്‍ശനം ഇന്ന് ആര്‍ട്ട് ഗാലറിയില്‍ ആരംഭിക്കും. ചെറുപ്പം മുതലേ ചിത്രകലയെ സ്‌നേഹിക്കുന്ന അന്‍സറിന്റെ ആദ്യത്തെ ചിത്രപ്രദര്‍ശനമാണിത്. അക്രിലിക്, വാട്ടര്‍ കളര്‍, ഓയില്‍പെയ്ന്റ് തുടങ്ങിയവ ഉപയോഗിച്ചാണ് അന്‍സര്‍ പെയിന്റിങ് തീര്‍ത്തിരിക്കുന്നത്. കൂടാതെ ശില്‍പ്പങ്ങളും പ്രദര്‍ശനത്തിനുണ്ട്. ജോലിക്കിടയില്‍ കിട്ടുന്ന ഇടവേളകളിലാണ് അന്‍സര്‍ ചിത്രം വരയ്ക്കുന്നത്.
ബോള്‍പെന്‍ മാത്രമുപയോഗിച്ച് വരച്ച ചിത്രങ്ങളും അന്‍സറിന്റെ ശേഖരത്തിലുണ്ട്. കാലിക്കറ്റ് യൂനിവേഴ്‌സിറ്റിയില്‍ നിന്ന് ചിത്രകലാ പഠനം പൂര്‍ത്തിയാക്കിയ ഇദ്ദേഹം പിന്നീട് മൂന്നു വര്‍ഷത്തോളം കുവൈത്തില്‍ ഗ്ലാസ് കളറിങ് ആര്‍ട്ടിസ്റ്റായി ജോലി ചെയ്തു. ഇതിനിടയിലാണ് സുല്‍ത്താന്‍ ബത്തേരിയിലെ കെ.എസ്.ആര്‍.ടി.സി ഡിപ്പോയില്‍ പെയിന്ററായി ജോലി ലഭിച്ചത്. ഇപ്പോള്‍ കോഴിക്കോട്ടെ നടക്കാവ് ഡിപ്പോയിലാണ് അന്‍സാര്‍ ജോലി ചെയ്യുന്നത്. ജോലിക്കിടയിലും യാത്രയിലും കാണുന്ന ദൃശ്യങ്ങളെല്ലാം വീട്ടിലെത്തിയാലുടനേ അന്‍സര്‍ കാന്‍വാസില്‍ പകര്‍ത്തും. ചിത്രപ്രദര്‍ശനം ചിത്രകാരി കബിതാ മുഖോപാധ്യായ ഉദ്ഘാടനം ചെയ്യും. പ്രദര്‍ശനം 18 വരെ തുടരുമെന്ന് അന്‍സര്‍ സൂഫി, അജിത്ത്കുമാര്‍ വാര്‍ത്താ സമ്മേളനത്തില്‍ അറിയിച്ചു.