കാളികാവ്: സാന്ത്വന പരിചരണ കേന്ദ്രത്തിന് പിന്തുണയുമായി കാളികാവിലെ ഗുഡ്‌സ് ഓട്ടോ ഡൈവര്‍മാര്‍. ദിവസവും കിട്ടുന്ന വരുമാനത്തില്‍ നിന്ന് ഒരു തുക മാറ്റിവെച്ച് സാന്ത്വന പരിചരണ കേന്ദ്രത്തിന് കൈമാറി. റബറിനും കാര്‍ഷിക ഉല്‍പന്നങ്ങള്‍ക്കുമുള്ള വിലത്തകര്‍ച്ചയെ തുടര്‍ന്ന് മലയോര മേഖല കടുത്ത സാമ്പത്തിക പ്രതിസന്ധിയിലാണ്. സാമ്പത്തിക പ്രയാസമുള്ളതിനാല്‍ നിര്‍മാണ മേഖല സ്തംഭിച്ചതിനാല്‍ ഗുഡ്‌സ് വാഹനങ്ങള്‍ക്കും ഓട്ടവും വരുമാനവും കുറവുമാണ്.
         വരുമാനക്കുറവ് വകവെക്കാതെയാണ് ഓരോരുത്തരുടെയും വിഹിതം സമാഹരിച്ച് സാന്ത്വന പരിചരണ കേന്ദ്രത്തിന് സഹായം നല്‍കിയത്. പല ഘട്ടങ്ങളിലായി ഗുഡ്‌സ് ഡ്രൈവര്‍മാരുടെ കൂട്ടായ്മ സാന്ത്വന പരിചരണ കേന്ദ്രങ്ങള്‍ക്കുള്‍പെടെ സാമ്പത്തിക സഹായം ചെയ്യുന്നുണ്ട്.കുടുംബം പോറ്റാന്‍ പാടുപെടുമ്പോഴും സമൂഹത്തിന്റെ കണ്ണീരൊപ്പാന്‍ ശ്രദ്ധിക്കുന്ന ഡ്രൈവര്‍മാരെ സാന്ത്വന പരിചരണ കേന്ദ്രം ഭാരവാഹികള്‍ അഭിനന്ദിച്ചു. ഗുഡ്‌സ് ഓട്ടോ സ്റ്റാന്‍ഡില്‍ ലളിതമായ രൂപത്തില്‍ സമാഹരിച്ച തുക സാന്ത്വന പരിചരണ കേന്ദ്രത്തിന് കൈമാറി. തുക കൈമാറ്റ ചടങ്ങില്‍ കാളികാവിലെ മുഴുവന്‍ ഗുഡ്‌സ് ഓട്ടോ ഡ്രൈവര്‍മാരും പങ്കാളികളായി.