മാറഞ്ചേരി: ഗ്രാമസഭയിലേക്ക് വാര്‍ഡിലെ കൂടുതല്‍പ്പേരെ ആകര്‍ഷിപ്പിക്കാന്‍ സമ്മാനപദ്ധതിയുമായി വാര്‍ഡ് അംഗങ്ങള്‍. മാറഞ്ചേരി ഗ്രാമപഞ്ചായത്തിലെ കോണ്‍ഗ്രസ് അംഗങ്ങളായ എം.പി നൗഷാദ്, ടി ശ്രീജിത്ത് എന്നിവരാണ് തങ്ങളുടെ വാര്‍ഡിലെ ഗ്രാമസഭയില്‍ പങ്കെടുക്കുന്നവരില്‍ നിന്ന് നറുക്കെടുപ്പിലൂടെ തെരഞ്ഞെടുക്കപ്പെടുന്ന ഒരു ഭാഗ്യശാലിക്ക് സമ്മാനം നല്‍കുന്നത്.
ഞായറാഴ്ച നടന്ന ഒന്‍പതാം വാര്‍ഡ് ഗ്രാമസഭയില്‍ നിന്ന്  തെരഞ്ഞെടുത്ത ഗിരിജാ ചന്ദ്രനുള്ള സമ്മാനവിതരണം ഗ്രാമപഞ്ചായത്ത് പ്രസിഡന്റ് അഡ്വ. ഇ സിന്ധു നിര്‍വഹിച്ചു. പത്താംവാര്‍ഡ് ഗ്രാമസഭയില്‍ നിന്ന്  തെരഞ്ഞെടുത്ത ഫസീല പട്ടത്തേലിനുള്ള സമ്മാനവിതരണം ആരോഗ്യ-വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാന്‍ കെ.വി ഹംസ നിര്‍വഹിച്ചു.