മലപ്പുറം: സായുധസേനാ പതാക ദിനത്തിന്റെ ജില്ലാതല ഉദ്ഘാടനം ഡിസംബര്‍ ഏഴിന് കലക്ടറേറ്റ് സമ്മേളന ഹാളില്‍ നടത്താന്‍ എ.ഡി.എം പി. സയ്യിദ് അലിയുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചു. പതാകദിനത്തോടനുബന്ധിച്ചു ജില്ലയില്‍നിന്ന് 20 ലക്ഷം രൂപ സമാഹരിക്കും.
ഇതിനായി 1,90,000 ടോക്കണ്‍ ഫ്‌ളാഗുകളും 5000 കാര്‍ ഫ്‌ളാഗുകളും വിതരണം ചെയ്യും. നൂറിലധികം സര്‍ക്കാര്‍  ഓഫിസുകളും സ്വകാര്യ സ്ഥാപനങ്ങളുംവഴിയാണ് ഫണ്ട് സമാഹരണം നടത്തുന്നത്. ടോക്കണ്‍ ഫ്‌ളാഗിന് 10 രൂപയും കാര്‍ ഫ്‌ളാഗിന് 20 രൂപയുമാണ് വില.  
കഴിഞ്ഞ വര്‍ഷം പതാക വില്‍പനവഴി ജില്ലയില്‍നിന്ന് 20,95,000 രൂപ സമാഹരിച്ചതായി ജില്ലാ സൈനിക ക്ഷേമ ഓഫിസര്‍ എം.വി ശങ്കരന്‍ അറിയിച്ചു. യോഗത്തില്‍ ഡെപ്യൂട്ടി കലക്ടര്‍ എന്‍. പുരുഷോത്തമന്‍, വിവിധ വകുപ്പ് ഉദ്യോഗസ്ഥര്‍ പങ്കെടുത്തു.