തേഞ്ഞിപ്പലം: ദേശീയപാത പാണമ്പ്രയില്‍ ഓടുന്നതിനിടെ ടയര്‍ ഊരിത്തെറിച്ച് നിയന്ത്രണംവിട്ട പിക്കപ്പ് വാന്‍ റോഡരികില്‍ മറിഞ്ഞു. വാഹനത്തിനകത്തുണ്ടായിരുന്ന മൂന്നു പേര്‍ പരുക്കേല്‍ക്കാതെ രക്ഷപ്പെട്ടു. ഓടികൂടിയവര്‍ വാഹനത്തിന്റെ ചില്ല് തകര്‍ത്താണ് ഇവരെ രക്ഷപ്പെടുത്തിയത്.
മണ്ണാര്‍ക്കാട്ടുനിന്നു താഴെചേളാരിയിലേക്ക് വാഴക്കുലകളുമായി വന്ന ലോറിയാണ് അപകടത്തില്‍പെട്ടത്. ഇന്നലെ വൈകിട്ട് അഞ്ചരയോടെയായിരുന്നു അപകടം. പാണമ്പ്ര അങ്ങാടിയിലുള്ള വില്ലേജ് ഓഫിസിന് സമീപമാണ് വാഹനം മറിഞ്ഞത്. റോഡരികില്‍ കാല്‍ നടയാത്രക്കാരും മറ്റു വാഹനങ്ങളും ഇല്ലാത്തതു ദുരന്തം ഒഴിവാക്കി.