കൂത്തുപറമ്പ്: സമൂഹത്തെ ഏറെ പ്രയാസത്തിലാക്കുന്ന കാന്‍സര്‍ പോലുള്ള രോഗങ്ങളെക്കുറിച്ച് ജനങ്ങളെ ബോധവല്‍ക്കരിക്കാനും പ്രതിരോധ പ്രവര്‍ത്തനങ്ങള്‍ നടത്താനും സമൂഹമൊന്നാകെ മുന്നോട്ടു വരണമെന്ന് മന്ത്രി കെ.കെ ശൈലജ പറഞ്ഞു.
കൂത്തുപറമ്പ് ലയണ്‍സ് ക്ലബ്ബിന്റെ നേതൃത്വത്തില്‍ കൂത്തുപറമ്പ് നഗരസഭയുടെയും മലബാര്‍ കാന്‍സര്‍ കെയര്‍ സെന്ററിന്റെയും സഹകരണത്തോടെ കൂത്തുപറമ്പ് നഗരസഭയില്‍ നടപ്പിലാക്കുന്ന സഞ്ജീവനി സമഗ്ര കാന്‍സര്‍ നിയന്ത്രണ പദ്ധതിയുടെ ഭാഗമായി വളണ്ടിയര്‍മാര്‍ക്കുള്ള പരിശീലന പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി.
നിര്‍മലഗിരി റാണിജയ് ഹയര്‍ സെക്കന്‍ഡറി സ്‌കൂളില്‍ നടന്ന പരിപാടിയില്‍ നഗരസഭാ അധ്യക്ഷന്‍ എം സുകുമാരന്‍ അധ്യക്ഷനായി. ഡോ.എ ജോസഫ്, ഐപ്പ് തോമസ്, ഡോ. സുചിത്ര സുധീര്‍ എന്നിവര്‍ മുഖ്യാതിഥികളായി. മലബാര്‍ കാന്‍സര്‍ കെയര്‍ സൊസൈറ്റി ചെയര്‍മാന്‍ ഡി കൃഷ്ണനാഥ പൈ, ഡോ.വി.സി രവീന്ദ്രന്‍ എന്നിവര്‍ ക്ലാസെടുത്തു. സിസ്റ്റര്‍ ലസ്ലിന്‍, വി.കെ മനോജ് കുമാര്‍, എം.പി മറിയംബീവി, എ പ്രമോദ്, എന്‍.കെ ശ്രീനിവാസന്‍, പ്രകാശന്‍ കാണി, കെ ബാബു, സി പത്മന്‍ പ്രസംഗിച്ചു.