അങ്ങാടിപ്പുറം: വൈലോങ്ങരയിലെ ആണിക്കല്ലില്‍ ചേരമുട്ടകള്‍ വിരിഞ്ഞു. കഴിഞ്ഞ മാസം ആറാം തീയതിയാണു വൈലോങ്ങര ആണിക്കല്ലില്‍ റോഡിലെ മാളത്തില്‍ നിന്നും രണ്ടു ഡസനോളം മുട്ടകള്‍ കണ്ടെടുത്തത്.
മുട്ടകള്‍ ശ്രദ്ധയില്‍പ്പെട്ട നാട്ടുകാര്‍ മലപ്പുറത്തെ പ്രശസ്ത പാമ്പുപിടുത്തക്കാരന്‍ ഉപ്പൂടന്‍ റഹ്മാനെ വിവരമറിയിക്കുകയായിരുന്നു. തുടര്‍ന്നു സ്ഥലത്തെത്തിയ ഉപ്പൂടന്‍ റഹ്മാന്‍ ചേരയെ പരിസരങ്ങളിലെല്ലാം തെരഞ്ഞെങ്കിലും കണ്ടെത്താനായില്ല.
ഒടുവില്‍ മാളത്തില്‍ നിന്നും കണ്ടെടുത്ത മുട്ടകളുമായി ഉപ്പൂടന്‍ റഹ്മാന്‍ വീട്ടിലേക്കു തിരിച്ചു. അന്നു കണ്ടെത്തിയ 24 മുട്ടകളില്‍ നിന്നും പകുതിയോളം മുട്ടകളാണു കഴിഞ്ഞ ദിവസം വിരിഞ്ഞത്.
ചേരക്കുഞ്ഞുങ്ങളെ സമീപത്തെ പാടശേഖരത്തിലേക്ക് കൊണ്ടുവിടാന്‍ ഒരുങ്ങുകയാണ് ഉപ്പൂടന്‍ റഹ്മാാന്‍.