മുക്കം: കോഴിഫാം ഉടമയായ യുവാവ് ഫാമില്‍ ഷോക്കേറ്റ് മരിച്ച സംഭവം ആസൂത്രിത കൊലപാതകമാണെന്ന് സംശയിക്കുന്നതായും കേസില്‍ സമഗ്രാന്വേഷണം നടത്തണമെന്നും  ആവശ്യപ്പെട്ട് ബന്ധുക്കള്‍ രംഗത്ത്. തിരുവമ്പാടി പഞ്ചായത്തിലെ ആനക്കാംപൊയില്‍ വടക്കേ പുറത്ത് ബിജു (42) മരണം സംബന്ധിച്ചാണ് വിവാദമുയര്‍ന്നിരിക്കുന്നത്.
കഴിഞ്ഞ മാര്‍ച്ച് 27ന് വൈകുന്നേരത്തോടെയാണ് ബിജുവിനെ കക്കാട്ട് പാറയിലെ ഫാമില്‍ ഷോക്കേറ്റ നിലയില്‍ കാണപ്പെട്ടത്.വീട്ടില്‍ നിന്നും ഏകദേശം ഒരു കിലോമീറ്റര്‍ അകലെ സുഹൃത്ത് ബെന്നിയുടെ സ്ഥലത്താണ് ബിജു കോഴിഫാം നടത്തിയിരുന്നത്.ആദ്യം കൂട്ടായി ഫാം നടത്താനായിരുന്നു ബിജുവും ബെന്നിയും തിരുമാനിച്ചിരുന്നതെങ്കിലും പിന്നീട് ബെന്നി പിന്‍മാറുകയായിരുന്നു. ഫാം മൂലം തന്റെ കുടുംബത്തിന് ദോഷമാണെന്നും അതിനാല്‍ ഇത് ഒഴിവാക്കണമെന്നും സ്ഥലമുടമ ബിജുവിനോട് നിരന്തരം ആവശ്യപ്പെടാറുണ്ടായിരുന്നു. എന്നാല്‍ ഫാമിനായി വന്‍ തുക ചെലവഴിച്ചതിനാല്‍ ബിജു പിന്‍മാറാന്‍ തയാറായില്ല. ഇത് സംബന്ധിച്ച് ഇരുവര്‍ക്കുമിടയില്‍ അസ്വാരസ്യം നിലനിന്നിരുന്നതായി ബിജുവിന്റെ ഭാര്യ സിജിയും അവരുടെ മാതാവ് മേരിയും വാര്‍ത്താ സമ്മേളനത്തില്‍ പറഞ്ഞു.
ഫാമില്‍ നിന്ന് അബദ്ധത്തില്‍ ഷോക്കേല്‍ക്കാനുള്ള സാധ്യതയില്ലെന്നും ഫാമിലെ സി.സി.ടി.വിയുടെ മെമ്മറി കാര്‍ഡും യു.എസ്.ബി.യും കാണാതായതില്‍ ദുരൂഹതയുണ്ടെന്നും അവര്‍ ആരോപിച്ചു. നടപടിയാവശ്യപ്പെട്ട് വടകര റൂറല്‍ എസ്.പിക്കും നിയോജക മണ്ഡലം എം.എല്‍.എ മുഖേന മുഖ്യമന്ത്രിക്കും പരാതി നല്‍കിയെങ്കിലും നടപടിയുണ്ടായിട്ടില്ല. പ്രതികളെന്നു സംശയിക്കുന്നവര്‍ രാഷ്ട്രീയ സ്വാധീനമുപയോഗിച്ച് അന്വേഷണം അട്ടിമറിക്കാന്‍ ശ്രമിക്കുന്നതായും അവര്‍ പറഞ്ഞു. ഈ സാഹചര്യത്തില്‍ നീതി തേടി കോടതി സമീപിക്കുമെന്നും അവര്‍ വ്യക്തമാക്കി.