മേപ്പയ്യൂര്‍: ചെറുവണ്ണൂര്‍ പഞ്ചായത്തിലെ മൂഴിക്കല്‍കടവില്‍ അനധികൃതമായി മണല്‍വാരുന്നതും ലോറിയില്‍ കടത്തുന്നതും പിടികൂടാനെത്തിയ പൊലിസുകാരെ മണല്‍മാഫിയാ സംഘം ലോറിയിടിച്ച് അപായപ്പെടുത്താന്‍ ശ്രമിച്ചു. സംഭവത്തില്‍ മേപ്പയ്യൂര്‍ സ്റ്റേഷനിലെ സി.പി.ഒ സുനില്‍കുമാറിനു ഗുരുതരമായ പരുക്കേറ്റു.
തിങ്കളാഴ്ച അര്‍ധരാത്രിയാണു സംഭവം. മേപ്പയ്യൂര്‍ എസ്.ഐ ഉള്‍പ്പെടെയുള്ള സംഘത്തിനു നേരെ മിനിലോറി ഇടിച്ചുകയറ്റാന്‍ ശ്രമിക്കുകയായിരുന്നു. പരുക്കേറ്റ സുനില്‍കുമാറിനെ പേരാമ്പ്ര ആശുപത്രിയില്‍നിന്ന് കോഴിക്കോട് മെഡിക്കല്‍ കോളജിലേക്കു മാറ്റി.
ചെറുവണ്ണൂര്‍ പഞ്ചായത്തിലെ മുഴുവന്‍ പുഴക്കടവുകളിലും മണല്‍ക്കൊള്ള വ്യാപകമാണെന്ന പരാതിയുടെ അടിസ്ഥാനത്തിലാണ് മേപ്പയ്യൂര്‍ എസ്.ഐ പി.കെ ജിതേഷിന്റെ നേതൃത്വത്തിലുള്ള മൂന്നംഗ പൊലിസ് സംഘം മൂഴിക്കല്‍ കടവിലെത്തിയത്. പരിശോധനയ്ക്കിടെ മിന്നല്‍ വേഗത്തില്‍ പൊലിസിനുനേരെ വാഹനം ഇടിച്ചുകയറ്റുകയായിരുന്നു. ഉദ്യോഗസ്ഥര്‍ റോഡില്‍നിന്ന് ഒഴിഞ്ഞുമാറിയതിനാല്‍ വന്‍ദുരന്തം ഒഴിവായി.
പൊടിക്കുപ്പിയെന്ന കോട്ടയില്‍ അബ്ദുല്ല ഉള്‍പ്പെടെ ആറോളം പേര്‍ സംഘത്തിലുണ്ടായിരുന്നതായി പൊലിസ് പറഞ്ഞു. മണല്‍വാരല്‍ നിരോധനം ഏര്‍പ്പെടുത്തിയതു മുതല്‍ മേഖലയില്‍ മണല്‍ക്കടത്തു വ്യാപകമാണ്. മേപ്പയ്യൂര്‍ മുതല്‍ വലിയ സംഘങ്ങള്‍ തന്നെ കടത്തിനായി പ്രവര്‍ത്തിക്കുന്നുണ്ട്.