കാക്കവയല്‍: ദേശീയപാതയില്‍ വീണ്ടും ആശുപത്രി മാലിന്യം തള്ളി. കാക്കവയല്‍ മുസ്‌ലിം പള്ളിക്ക് മുന്‍വശത്ത് ദേശീയപാതയോരത്താണ് കഴിഞ്ഞ ദിവസം മാലിന്യം തള്ളിയത്. ഇന്നലെ രാവിലെ വ്യാപാരികളാണ് ചാക്കില്‍ കെട്ടിയ നിലയില്‍ മാലിന്യം കണ്ടത്. രക്തം പുരണ്ട തുണികളും ഉപേക്ഷിക്കപ്പെട്ട സിറിഞ്ചുകളും പ്ലാസ്റ്റിക്ക് മാലിന്യവുമുള്‍പ്പെടെ ചാക്കിലുണ്ടായിരുന്നു. അഴുകിയ നിലയിലായിരുന്ന മാലിന്യങ്ങള്‍. മുന്‍പ് സുധിക്കവലയില്‍ സിറിഞ്ചുകളും മരുന്നുകുപ്പികളുമുള്‍പ്പെടെ തള്ളിയത് പ്രതിഷേധത്തിനിടയാക്കിയിരുന്നു.
മാലിന്യങ്ങള്‍ രാത്രി സമയങ്ങളില്‍ ആള്‍പ്പാര്‍പ്പില്ലാത്ത ഇടങ്ങളില്‍ തള്ളുന്ന ആശുപത്രികള്‍ക്കെതിരേയും ക്ലിനിക്കുകള്‍ക്കെതിരേയും നടപടിയുണ്ടാവുന്നില്ലെന്ന് ആക്ഷേപമുയര്‍ന്നിരുന്നു. സുധിക്കവലയില്‍ ഉപേക്ഷിച്ച മാലിന്യത്തിലെ കുപ്പികള്‍ പൊട്ടി വഴിയാത്രക്കാര്‍ക്ക് ദുരിതമായിരുന്നു. തുടര്‍ന്ന് പ്രദേശവാസികള്‍ പ്രതിഷേധവുമായി രംഗത്തെത്തിയിരുന്നു.
രാത്രിയുടെ മറവില്‍ മാലിന്യം വലിച്ചെറിയുന്നവരെ പിടികൂടാന്‍ സംവിധാനം ഒരുക്കണമെന്ന് ആവശ്യമുയര്‍ന്നിരുന്നു. കാക്കവയലിലും പരിസരങ്ങളിലും ഹോട്ടല്‍ മാലിന്യമുള്‍പ്പെടെ തള്ളുന്നെന്ന പരാതിക്കിടെയാണ് കാക്കവയലില്‍ വീണ്ടും ആശുപത്രി മാലിന്യവും  തള്ളിയത്. മാരക രോഗങ്ങള്‍ക്ക് വരെ കാരണമായേക്കാവുന്ന ഇത്തരം മാലിന്യങ്ങള്‍ തള്ളുന്നവരെ കണ്ടെത്തി മാതൃകാപരമായി ശിക്ഷിക്കണമെന്ന ആവശ്യമാണ് നാട്ടുകാരുന്നയിക്കുന്നത്.