കൊച്ചി: മാറാട് ഒന്നാം കലാപത്തിനിടെ മാറാട് തെക്കേത്തൊടി ഷിംജിത്തിനെ കൊലപ്പെടുത്തിയ കേസില്‍ ഏഴു പ്രതികളുടെ ജീവപര്യന്തം തടവുശിക്ഷ ഹൈക്കോടതി റദ്ദാക്കി.
പ്രതികള്‍ക്കെതിരായ കൊലക്കുറ്റം സംശയാതീതമായി തെളിയിക്കാന്‍ പ്രോസിക്യൂഷനു കഴിഞ്ഞില്ലെന്ന് വ്യക്തമാക്കിയാണ് ഡിവിഷന്‍ ബെഞ്ച് ജീവപര്യന്തം തടവുശിക്ഷ റദ്ദാക്കിയത്. എന്നാല്‍, മതസ്പര്‍ദ്ധ വളര്‍ത്തല്‍, വീടുകയറി ആക്രമണം തുടങ്ങിയ കുറ്റങ്ങളില്‍ ഈ പ്രതികള്‍ക്ക് വിചാരണക്കോടതി വിധിച്ച അഞ്ചു വര്‍ഷത്തെ തടവ് നിലനില്‍ക്കുമെന്നും ഹൈക്കോടതി വ്യക്തമാക്കിയിട്ടുണ്ട്.
മാറാട് കേസിലെ ആദ്യ നാലു പ്രതികളായ ലത്തീഫ്, പള്ളിത്തൊടി റിസാല്‍ ബാബു, നാലുകുടി പറമ്പില്‍ മനാഫ്, നൗഫല്‍, ഏഴാം പ്രതി സീമാമ്മൂന്റകത്ത് മനാഫ്, ഒന്‍പതാം പ്രതി  ഷാഫി, 20ാം പ്രതി  അനഫി എന്നിവരാണ് ജീവപര്യന്തം തടവിനെതിരേ ഹൈക്കോടതിയെ സമീപിച്ചത്. ഈ പ്രതികള്‍ക്കെതിരേ കൊലക്കുറ്റം ഒഴികെയുള്ള മറ്റു കുറ്റങ്ങള്‍ നിലനില്‍ക്കുമെന്നും ഡിവിഷന്‍ ബെഞ്ചിന്റെ ഉത്തരവിലുണ്ട്. 2002 ജനുവരി മൂന്നിന് രാത്രി ഷിംജിത്തിനെ വീട്ടില്‍ക്കയറി വെട്ടിക്കൊലപ്പെടുത്തിയെന്നാണ് കേസ്.