പെരുമ്പാവൂര്‍: 11 കെ.വി വൈദ്യുതി ലൈനിന് മുകളില്‍ കയറി അന്യസംസ്ഥാന തൊഴിലാളി ആത്മഹത്യക്ക് ശ്രമിച്ചു. ഗുരുതരമായി പൊള്ളലേറ്റ അസം സ്വദേശിയെ ആശുപത്രിയില്‍ പ്രവേശിപ്പിച്ചു.
വട്ടയ്ക്കാട്ടുപടി വെള്ളത്തറ വെയ്ബ്രിഡ്ജിന് സമീപം ഇന്നലെ രാവിലെ ഒമ്പത് മണിയോടെയാണ് സംഭവം. വൈദ്യുതി ലൈനിന് മുകളില്‍ കയറി ആത്മഹത്യക്ക് ശ്രമിച്ചതാണ് ഇയാളെന്ന് നാട്ടുകാര്‍ പറഞ്ഞു.
ഷോക്കേറ്റതിന് തുടര്‍ന്ന് ഇയാള്‍ വൈദ്യുതി ലൈനിന് മുകളില്‍ കുരുങ്ങി. നാട്ടുകാര്‍ വിവരമറിയച്ചതനുസരിച്ച് പെരുമ്പാവൂര്‍ ഫയര്‍ ഫോഴ്‌സ് സംഘം സാഹസികമായി രക്ഷപ്പെടുത്തുകയായിരുന്നു. ലൈനിന് മുകളില്‍ കയറിയ ഫയര്‍ഫോഴ്‌സ് ഇയാളെ വലയില്‍ കിടത്തി താഴെയിറക്കുകയായിരുന്നു. ഇരുകാലുകള്‍ക്കും വയറിലും ഗുരുതരമായി പൊള്ളലേറ്റ ഇയാളെ കളമശ്ശേരി മെഡിക്കല്‍ കോളജില്‍ പ്രവേശിപ്പിച്ചു. 50 ശതമാനം പൊള്ളലേറ്റിട്ടുള്ളതായി ഫയര്‍ ഫോഴ്‌സ് പറഞ്ഞു.