കാക്കനാട്: സമൂഹത്തില്‍ ഏറ്റവും കൂടുതല്‍ നന്മയും തിന്മയും സ്വാധീനം ചെലുത്താന്‍ കഴിയുന്നവരാണ് വിദ്യാര്‍ഥി യുവജന വിഭാഗമെന്നും അവരുടെ ഈ സര്‍ഗശേഷി സമൂഹത്തില്‍ ധാര്‍മികത നിര്‍വഹിച്ചെടുക്കാന്‍ ഉപയോഗപ്പെടുത്തണമെന്നും സമസ്ത കേന്ദ്ര മുശാവറ അംഗം ഇ.എസ് ഹസന്‍ ഫൈസി പറഞ്ഞു.
എസ്.കെ.എസ്.എസ്.എഫ് കളമശ്ശേരി മേഖല കമ്മിറ്റി നവംബര്‍ 18, 19, 20 തീയതികളില്‍ കൈപ്പടമകള്‍ വാദിഹുദയില്‍ സംഘടിപ്പിക്കുന്ന ഹിദായ കോണ്‍ഫറന്‍സ് 2016 ന്റെ സ്വാഗത സംഘ രൂപീകരണ കണ്‍വന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഏക സിവില്‍ കോഡ് വിശ്വാസത്തിന്റെ അടിത്തറക്ക് ഭീഷണിയാണെന്നും സമൂഹം അതിനെതിരേ ഒറ്റക്കെട്ടായി രംഗത്തു വരണമെന്നും മുഖ്യ പ്രഭാഷണം നടത്തിയ ഖുര്‍ആന്‍ സ്റ്റഡി സെന്റര്‍ ജില്ലാ  പ്രസിഡന്റ് എം.എം അബുബക്കര്‍ ഫൈസി അഭിപ്രായപ്പെട്ടു. മേഖലാ പ്രസിഡന്റ് പി.എച്ച് അജാസ് അധ്യക്ഷത വഹിച്ചു.
എസ്.വൈ.എസ് സംസ്ഥാന വൈസ് പ്രസിഡന്റ് എ.എം പരീത്,  എസ്‌കെഎസ്എസ്എഫ് ജില്ലാ ജനറല്‍ സെക്രട്ടറി പി.എം ഫൈസല്‍, ഖുര്‍ആന്‍ സ്റ്റഡി സെന്റര്‍ ജില്ലാ സെക്രട്ടറി എം.ബി മുഹമ്മദ്, എസ്.വൈ.എസ് മണ്ഡലം പ്രസിഡന്റ് എ.പി ഇബ്രാഹിം, ജനറല്‍ സെക്രട്ടറി അലിയാര്‍ കരുവള്ളി, തുടങ്ങിയവര്‍ പ്രസംഗിച്ചു.
കെ.എസിദ്ദീഖ് ചെയര്‍മാനും, സൈനുദ്ദീന്‍ വാഫി ജനറല്‍ കണ്‍വിനറും, നിയാസ് മുണ്ടം പാലം വര്‍ക്കിങ് കണ്‍വിനറും, അബ്ദുള്‍ റസ്സാഖ് ട്രഷററുമായി വിപുലമായ സ്വാഗതസംഘം കമ്മറ്റിക്ക് കണ്‍വെന്‍ഷന്‍ രൂപം നല്‍കി. മേഖല ജനറല്‍ സെക്രട്ടറി നൗഫല്‍ തീനാടന്‍ സ്വാഗതവും, ട്രഷറര്‍ മുഹമ്മദ് സാദിഖ് നന്ദിയും പറഞ്ഞു.