മുവാറ്റുപുഴ: ഗവണ്‍മെന്റ് ജനറല്‍ ആശുപത്രിയിലെ പുതിയ മോര്‍ച്ചറി നവീകരണത്തിന്റെ പിതൃത്വം എം.എല്‍.എ ഏറ്റെടുക്കാന്‍ ശ്രമിക്കുന്നുവെന്ന് കോണ്‍ഗ്രസ് ബ്ലോക്ക് കമ്മിറ്റി ആരോപിച്ചു.
കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് ജോസഫ് വാഴക്കന്‍ എം.എല്‍.എ ആയിരുന്നപ്പോള്‍ 2016 ജനുവരി എട്ടിനാണ് മുവാറ്റുപുഴ ജനറല്‍ ഗവണ്‍മെന്റ് ആശുപത്രി മോര്‍ച്ചറി കെട്ടിടത്തിന്റെ അറ്റകുറ്റ പണികള്‍ക്കും അത്യാധുനിക സൗകര്യങ്ങളോട് കുടിയ ഫ്രീസര്‍ സ്ഥാപിക്കുന്നതിനും വൈദ്യുതീകരണത്തിനുമായി 37.10 ലക്ഷം രൂപ അനുവദിച്ചത്.
കിഴക്കന്‍ മേഖലയിലെ പൊലിസ് സര്‍ജന്റെ സേവനവും കഴിഞ്ഞ യു.ഡി.എഫ് സര്‍ക്കാരിന്റെ കാലത്താണ് ലഭ്യമാക്കിയത്. വസ്തുത ഇതായിരിക്കെ എം.എല്‍.എ നടത്തുന്നത് എട്ട്കാലി മമ്മൂഞ്ഞിന്റെ പണിയാണെന്നും കോണ്‍ഗ്രസ് ബ്ലോക്ക് കമ്മറ്റി പറഞ്ഞു.
അധികാരത്തില്‍ വന്ന് മാസങ്ങള്‍ പിന്നിട്ടിട്ടും ടെണ്ടര്‍ നടപടി  പൂര്‍ത്തിയാക്കുന്നതിന് പകരം വീണ്ടും പ്രഖ്യാപനം നടത്തുന്നത് അപഹാസ്യമാണെന്നും കോണ്‍ഗ്രസ് ബ്ലോക് പ്രസിഡന്റ് കെ.എം പരീത് പറഞ്ഞു.