അരീക്കോട്: ആദിവാസികള്‍ക്ക് ഇനി സുഖമായി ഉറങ്ങാം. വിദ്യാര്‍ഥികളുടെ സേവന സന്നദ്ധതയില്‍ വിരിഞ്ഞ പ്രവര്‍ത്തനമാണ് ആദിവാസികള്‍ക്ക് തുണയാവുന്നത്. മൂര്‍ക്കനാട് സുബുലുസ്സലാം ഹയര്‍സെക്കന്‍ഡറി സ്‌കൂളിലെ എന്‍.എസ്.എസ് വിദ്യാര്‍ഥികളാണ് ഊര്‍ങ്ങാട്ടിരി പഞ്ചായത്തിലെ ചെക്കുന്ന് മൈലാടി കോളനിയിലെ ആദിവാസികള്‍ക്ക് കിടക്കകള്‍ എത്തിച്ച് കൊടുത്തത്. എന്‍.എസ്.എസ് യൂനിറ്റിന്റെ നേതൃത്വത്തില്‍ സ്‌നേഹ സമ്മാന പദ്ധതിയില്‍ ഉള്‍പ്പെടുത്തിയാണ് 18 ആദിവാസി കുടുംബങ്ങള്‍ക്ക് കിടക്കകള്‍ നല്‍കിയത്. എന്‍.എസ്.എസ് വളണ്ടിയര്‍മാരെ ആദിവാസികള്‍ സ്വീകരിച്ചു.
ആദിവാസികള്‍ക്കായി ലഹരി വിരുദ്ധ ബോധവല്‍ക്കരണം, ദാരിദ്ര്യ നിര്‍മാര്‍ജന പദ്ധതികള്‍, ആരോഗ്യ പാഠശാല ക്യാംപുകള്‍ തുടങ്ങിയ വിവിധ പരിപാടികളും നടത്തി. വാര്‍ഡ് അംഗം കെ ഗീത അധ്യക്ഷയായി. പ്രോഗ്രാം ഓഫീസര്‍ എം. കൃഷ്ണനുണ്ണി, അങ്കണവാടി അധ്യാപിക അമ്മിണി, മോഹന്ദാസ്, എന്‍.എസ്.എസ് വളണ്ടിയര്‍മാരായ നസീഫ്, മുഹമ്മദ് ഫവാസ്, ടിപ്പു സല്‍മാന്‍, മുഹ്‌സിന്‍, സയ്യിദ് മിഷല്‍ എന്നിവര്‍ നേതൃത്വം നല്‍കി.