പേരാമ്പ്ര: വാളൂര്‍ ഗവ. യു.പി സ്‌കൂള്‍ റോഡ് ടാറിങ് ചെയ്ത ഉടനെ തന്നെ തകര്‍ന്ന് യാത്രക്ക് പറ്റാത്ത നിലയിലായിട്ടും കരാര്‍ എടുത്ത കോണ്‍ട്രാക്റ്റരുടെ പേരില്‍ യാതൊരു നടപടിയും സ്വീകരിച്ചില്ലെന്ന് പ്രദേശവാസികളുടെ ആരോപണം.
2014-15 വര്‍ഷത്തെ എം.എല്‍.എ ഫണ്ടില്‍ ഉള്‍പ്പെടുത്തി പണി നടത്തിയ റോഡില്‍ ആവശ്യത്തിന് ടാറും മെറ്റലും ഉപയോഗിച്ചില്ലെന്നും പ്രവൃത്തിയില്‍ വ്യാപക കൃത്രിമം കാണിച്ചെന്നും നേരത്തെ പരാതി ഉയര്‍ന്നിരുന്നു. എന്നാല്‍ കരാര്‍ എടുത്ത കോണ്‍ട്രാക്റ്റര്‍ക്ക് ബില്‍ മാറ്റി കൊടുത്തിട്ടില്ലെന്നും റീ ടാര്‍ ചെയ്ത ശേഷമേ പണം നല്‍കുകയുള്ളൂവെന്നും പഞ്ചായത്ത് അധികൃതര്‍ പറയുന്നുവെങ്കിലും ആരുമറിയാതെ ഫണ്ട് കൈപ്പറ്റിയെന്ന് നാട്ടുകാര്‍ പറയുന്നു.
പ്രദേശവാസികളുടെയും സ്‌കൂള്‍ പി.ടി.എയുടെയും നിരന്തരമായ ആവശ്യത്തിനൊടുവിലാണ് കഴിഞ്ഞ പഞ്ചായത്ത് ഭരണസമിതി ലാപ്‌സാവുന്ന ഫണ്ടില്‍ നിന്നും മൂന്ന് ലക്ഷത്തോളം രൂപ വകയിരുത്തി ടാറിങ് പ്രവൃത്തി നടത്തിയത്.