മുക്കം: മുക്കം നഗരസഭ നടപ്പിലാക്കിയ ശുചിത്വ ഭവനം സുന്ദര നഗരംപദ്ധതിയില്‍ വന്‍ അഴിമതി നടന്നതായി കണ്ടത്തിയ സാഹചര്യത്തില്‍ സമഗ്ര അന്വേഷണം നടത്തണമെന്ന് യു.ഡി.എഫ് കൗണ്‍സിലര്‍മാര്‍ വാര്‍ത്താ സമ്മേളനത്തില്‍ ആവശ്യപ്പെട്ടു. യാതൊരു മാനദണ്ഡവും പാലിക്കാതെയാണ് മാലിന്യം കൊണ്ടുപോയത്. പ്രാഥമിക നടപടിയായ ടെണ്ടര്‍ പോലും ക്ഷണിച്ചിട്ടില്ല.
34 വണ്ടികള്‍ മാലിന്യവുമായി പോയി എന്നു പറയുന്നവര്‍ക്ക് വ്യക്തമായ രേഖകള്‍ ഹാജരാക്കാന്‍ പോലും സാധിച്ചിട്ടില്ലെന്നും യു.ഡി. എഫ് കൗണ്‍സിലര്‍മാര്‍ പറഞ്ഞു. ധനകാര്യ സ്റ്റാന്റിങ് കമ്മിറ്റിയില്‍ പണം നല്‍കരുതെന്ന് പറഞ്ഞ നഗരസഭാ വൈസ് ചെയര്‍പേഴ്‌സണ്‍ കഴിഞ്ഞ ദിവസം വാര്‍ത്താ സമ്മേളനം നടത്തിയതിലൂടെ ഇവരുടെ ഇരട്ടത്താപ്പ് പുറത്തായിരിക്കുകയാണന്നും ഇടതുമുന്നണിക്ക് വ്യക്തമായ ലീഡുള്ള ധനകാര്യ സ്റ്റാന്റിംഗ് കമ്മിറ്റിയില്‍ പണം നല്‍കരുതെന്ന് ഏറ്റവും ശക്തമായി ആവശ്യപെട്ടത് ഇടതു മുന്നണി അംഗം പ്രജിദ പ്രദീപാണന്നും യു.ഡി.എഫ് കൗണ്‍സിലര്‍മാര്‍ പറഞ്ഞു.സംഭവത്തില്‍ ശക്തമായ പ്രക്ഷോഭ പരിപാടികള്‍ക്ക് യു.ഡി.എഫ് നേതൃത്വം നല്‍കുമെന്നും കൗണ്‍സിലര്‍മാര്‍ പറഞ്ഞു. വാര്‍ത്താ സമ്മേളനത്തില്‍ ടി.ടി.സുലൈമാന്‍, പി.കെ.മുഹമ്മദ്, ഇ.പി.അരവിന്ദന്‍ ,അബ്ദുല്‍ ഹമീദ് എന്നിവര്‍ പങ്കെടുത്തു. നഗരസഭയിലെ മുഴുവന്‍ വാര്‍ഡുകളിലേയും അജൈവ മാലിന്യം ശേഖരിച്ച് കര്‍ണാടകയിലെ മാണ്ഡ്യയില്‍ കൊണ്ടുപോയി നല്‍കുന്നതായിരുന്നു പദ്ധതി. ആദ്യഘട്ടത്തില്‍ വന്‍വിജയമായിരുന്ന പദ്ധതിയിലാണ് ഇപ്പോള്‍ വന്‍ തുക ക്രമക്കേട് നടന്നതായി ആരോപണമുയര്‍ന്നിരിക്കുന്നത്.
പദ്ധതി പ്രകാരം 33ലോഡ് മാലിന്യങ്ങള്‍ നഗരസഭയില്‍ നിന്ന് മാണ്ഡ്യയിലെത്തിച്ചന്നാണ് നഗരസഭാധികൃതര്‍ പറയുന്നത്. ഒരു ലോഡിന് 25000 രൂപ വെച്ച് നല്‍കിയതായും പറയുന്നു. എന്നാല്‍ ഇതില്‍ സംശയം തോന്നിയ ചിലര്‍ വിവരാവകാശ നിയമപ്രകാരം നല്‍കിയ അപേക്ഷക്കുള്ള മറുപടിയിലാണ് ഞെട്ടിക്കുന്ന വിവരങ്ങള്‍ പുറത്തുവന്നത്. സംഭവത്തില്‍ യാതൊരു അഴിമതിയും നടന്നില്ലെന്ന് കഴിഞ്ഞ ദിവസം നഗരസഭാ അധികൃതര്‍ വാര്‍ത്താസമ്മേളനത്തില്‍ പറഞ്ഞിരുന്നു.