ചെറുപുഴ: ഗതാഗതക്കുരുക്കില്‍പ്പെട്ടു വലഞ്ഞതില്‍ ക്ഷുഭിതനായ കാര്‍ യാത്രക്കാരന്‍ എതിരേവന്ന കെ.എസ്.ആര്‍.ടി.സി ബസിന്റെ ചില്ലെറിഞ്ഞു തകര്‍ത്തു. ചൊവ്വാഴ്ച രാത്രി ഏഴരയോടെ ചെറുപുഴ വാണിയംകുന്നിലായിരുന്നു സംഭവം. മലയോര ഹൈവേ നിര്‍മാണം നടക്കുന്നതിനാല്‍ വാണിയംകുന്ന് ഭാഗത്ത് വാഹനങ്ങള്‍ കടന്നുപോകുന്നതിനു നിയന്ത്രണമേര്‍പ്പെടുത്തിയിരുന്നു. കാഞ്ഞങ്ങാട് നിന്നു ചെറുപുഴ വഴി ആലക്കോട് ഭാഗത്തേക്ക് പോവുകയായിരുന്ന ബസാണ് കാറിനെ കുടുക്കിയത്. കാര്‍ ഡ്രൈവറും ബസ് ജീവനക്കാരും തമ്മില്‍ വാക്കേറ്റമായി. കുരുക്ക് മാറി ബസ് കടന്നുപോയതിനുപിന്നാലെ കാറില്‍ നിന്നിറങ്ങി ഡ്രൈവര്‍ ബസ് ജീവനക്കാരെ ചീത്തവിളിച്ച് കല്ലെടുത്തെറിയുകയായിരുന്നു. ബസിന്റെ പിന്‍വശത്തെ ചില്ല് തകര്‍ന്നു. ഡ്രൈവര്‍ പിന്നീട് കാറോടിച്ചു പോയി. ബസ് ജീവനക്കാര്‍ ചെറുപുഴ പൊലിസില്‍ വിവരമറിയിക്കുകയും തുടര്‍ന്ന് യാത്രക്കാരെ ആലക്കോട് എത്തിച്ചശേഷം ബസ് ചെറുപുഴ സ്റ്റേഷനിലെത്തിക്കുകയും ചെയ്തു. പൊതുമുതല്‍ നശിപ്പിച്ച കുറ്റത്തിന് കാറുടമ കോഴിക്കോട് സ്വദേശി അബ്ദുല്‍ഖാദറിനെതിരേ ചെറുപുഴ പൊലിസ് കേസെടുത്തു.