ചട്ടഞ്ചാല്‍: വീടുവിട്ട യുവതിയെ മട്ടാഞ്ചേരിയില്‍ കണ്ടെത്തി. കുണ്ടൂര്‍ സ്വദേശിനിയായ 21 കാരിയെയാണു മട്ടാഞ്ചേരി പൊലിസ് കണ്ടെത്തിയത്. ഇക്കഴിഞ്ഞ ശനിയാഴ്ച രാവിലെയാണ് യുവതിയെ തെക്കിലിലെ ഭര്‍ത്താവിന്റെ വീട്ടില്‍ നിന്നു കാണാതായത്. മകനെ അങ്കണവാടിയില്‍ വിടാനെന്ന പേരില്‍ വീട്ടില്‍ നിന്നിറങ്ങിയ ഇവരെ പിന്നീട് കാണാതാവുകയായിരുന്നു. തുടര്‍ന്ന് ബന്ധുക്കള്‍ പലഭാഗങ്ങളിലും ഇവരെ അന്വേഷിച്ചെങ്കിലും കണ്ടെത്താനാവാത്തതിനെ തുടര്‍ന്ന് വിദ്യാനഗര്‍ പൊലിസില്‍ പരാതി നല്‍കി. സംഭവത്തില്‍ കേസെടുത്തു പൊലിസ് അന്വേഷണം നടത്തിയതോടെയാണ് കണ്ണൂര്‍ മട്ടന്നൂര്‍ സ്വദേശിയായ ഷാജാഹാനോടൊപ്പം ഇവര്‍ സ്ഥലം വിട്ടതായി കണ്ടെത്തിയത്. പൊലിസ് മട്ടന്നൂരിലെത്തി ഇവരെ തേടിയെങ്കിലും കണ്ടെത്തിയിരുന്നില്ല. തുടര്‍ന്നു മൊബൈല്‍ കേന്ദ്രീകരിച്ചു നടത്തിയ അന്വേഷണത്തിലാണ് ഇവര്‍ മട്ടാഞ്ചേരിയില്‍ ഉള്ളതായി കണ്ടെത്തിയത്.
മാസങ്ങള്‍ക്കു മുമ്പ് ചികിത്സയിലായിരുന്ന മാതാവിനോടൊപ്പം ആശുപത്രിയില്‍ കൂട്ടിരുന്നപ്പോള്‍ യുവതി ഷാജാഹനെ പരിചയപ്പെടുകയും കഴിഞ്ഞ ദിവസം ഇയാളോടൊപ്പം ഒളിച്ചോടുകയുമായിരുന്നു. അന്വേഷണത്തിനിടെ യുവതി എഴുതിയ കത്തും ഭര്‍ത്താവിനയച്ച വോയ്‌സ് ക്ലിപ്പും പൊലിസ് കണ്ടെത്തിയിരുന്നു. താന്‍ മൂന്നു മാസം മുമ്പ് തന്നെ ഷാജഹാനുമായി രജിസ്റ്റര്‍ വിവാഹം നടത്തിയെന്നു യുവതി പൊലിസിനോട് പറഞ്ഞതായാണ് സൂചന. ഇക്കാര്യം യുവതി എഴുതി വച്ച കത്തിലും സൂചിപ്പിച്ചതായി വിവരമുണ്ട്.