കാസര്‍കോട്: ജില്ലയിലെ എന്‍ഡോസള്‍ഫാന്‍ ദുരിതബാധിത പ്രദേശങ്ങളിലെ അമ്മമാര്‍ക്ക് തൊഴിലവസരമൊരുക്കി കുടുംബശ്രീ. നാഷണല്‍ റൂറല്‍ ലൈവ്‌ലിഹുഡ് മിഷന്‍ പദ്ധതിയുടെ ഭാഗമായി (ആജീവിക) തൊഴില്‍ സംരംഭങ്ങള്‍ ആരംഭിക്കുന്നതിനാണു പദ്ധതികള്‍ തയാറാക്കുന്നത്. ഇതിന്റെ ഭാഗമായി കലക്ടര്‍ കെ ജീവന്‍ബാബുവുമായി കുടുംബശ്രീ എന്‍.ആര്‍.എല്‍.എം ചീഫ് ഓപ്പറേറ്റിംഗ് ഒഫിസര്‍ അജിത് ചാക്കോയും പ്രോഗ്രാം മാനേജര്‍മാരായ സോയ തോമസ്, എം. പ്രഭാകരന്‍ ആര്‍.എസ് ജിജി, കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ അബ്ദുള്‍ മജീദ് ചെമ്പരിക്ക എന്നിവര്‍ ചര്‍ച്ച നടത്തി.
ഇതു സംബന്ധിച്ച കരട് റിപ്പോര്‍ട്ട് ഉടന്‍ സമര്‍പ്പിക്കാന്‍ കലക്ടര്‍ നിര്‍ദേശം നല്‍കി. തയ്യല്‍ യൂനിറ്റ്, ഗാര്‍മെന്റ് യൂണിറ്റ്, ബേക്കറി യൂനിറ്റ്, ഫയല്‍ ബോര്‍ഡ് നിര്‍മാണം, കരകൗശലനിര്‍മാണം തുടങ്ങിയ ചെറുകിട സംരംഭങ്ങള്‍ ആരംഭിക്കുന്നതിനാണു പദ്ധതിയിലൂടെ ലക്ഷ്യമിടുന്നത്.
കൃഷി, പച്ചക്കറി തുടങ്ങിയ സാധ്യതകളും പരിശോധിക്കും. ബഡ്‌സ് സ്‌കൂളുകളില്‍ പോകുന്ന കുട്ടികളുടെ കൂടെ വരുന്ന അമ്മമാര്‍ക്കു വേണ്ടി തൊഴില്‍ പരിശീലനകേന്ദ്രം ആരംഭിക്കുകയാണ് ആദ്യലക്ഷ്യം. പൂര്‍ണമായും കിടപ്പിലായ രോഗികളുടെ രക്ഷിതാക്കള്‍ക്ക് വീട്ടില്‍തന്നെ ചെയ്യാവുന്ന തൊഴിലുകള്‍ക്കു പരിഗണന നല്‍കും. ഇതിനായി പ്രത്യേകം അയല്‍ക്കൂട്ടങ്ങള്‍ രൂപീകരിക്കാനും പദ്ധതിയുണ്ട്. പ്രത്യേകം അയല്‍ക്കൂട്ടങ്ങളില്‍ നാലോ അഞ്ചോ അംഗങ്ങളാണുണ്ടാവുക. പ്രത്യേക അയല്‍ക്കൂട്ടങ്ങളുടെ ഏകോപനത്തിനു ജില്ലാതലത്തില്‍ സംവിധാനമൊരുക്കും.
ദുരിതബാധിതരുടെ അമ്മമാര്‍ക്ക് ഇത്തരം സംരംഭങ്ങളിലൂടെ വരുമാന മാര്‍ഗം കണ്ടെത്തുകയാണു ലക്ഷ്യം. ഇതിനായി മാര്‍ക്കറ്റിങ് സംവിധാനം ഒരുക്കുന്നതിനും നടപടി സ്വീകരിക്കും. എന്‍ഡോസള്‍ഫാന്‍ ദുരിതബാധിതരുള്‍പ്പെടുന്ന 11 പഞ്ചായത്തുകളിലും പദ്ധതിയുടെ ഗുണം ലഭിക്കണമെന്നു കലക്ടര്‍ പറഞ്ഞു.
വിദ്യാസമ്പന്നരായ അമ്മമാര്‍ക്ക് വീട്ടിലിരുന്ന് ഓണ്‍ലൈനായി ചെയ്യാവുന്ന തൊഴില്‍ മേഖലകളെക്കുറിച്ചും പരിശോധിക്കണമെന്ന് കലക്ടര്‍ കുടുംബശ്രീ അധികൃതര്‍ക്കു നിര്‍ദേശം നല്‍കി. എന്‍.ആര്‍.എല്‍.എം ഉദ്യോഗസ്ഥര്‍ ദുരിതബാധിത പ്രദേശങ്ങളിലെ ബഡ്‌സ് സ്‌കൂളുകള്‍ സന്ദര്‍ശിക്കുകയും സന്നദ്ധ പ്രവര്‍ത്തകരുമായി ചര്‍ച്ച നടത്തുകയും ചെയ്തു.