കാഞ്ഞങ്ങാട്: യാത്രക്കിടയില്‍ നഷ്ടപ്പെട്ട എ.ടി.എം കാര്‍ഡ് ഉപയോഗിച്ചു പണം തട്ടിയ സംഭവത്തില്‍ രണ്ടു പേരെ പൊലിസ് അറസ്റ്റു ചെയ്തു. കാഞ്ഞങ്ങാട് വെള്ളിക്കോത്ത് സ്വദേശികളായ വിനോദ്, ഇര്‍ഫാന്‍ എന്നിവരാണ് ബേഡകം പൊലിസിന്റെ പിടിയിലായത്. ബേഡകം മരുതുംകര സ്വദേശിനി സതീദേവിയുടെ എ.ടി.എം കാര്‍ഡാണ് യാത്രക്കിടയില്‍ നഷ്ടപ്പെട്ടത്. ഈ മാസം 11 ന് രാത്രി കാഞ്ഞങ്ങാട്ട് വച്ചാണു കാര്‍ഡ് നഷ്ടമായത്. കാര്‍ഡിന്റെ കൂടെ ഇതിന്റെ പിന്‍നമ്പറും ഉണ്ടായിരുന്നു. കാര്‍ഡ് കളഞ്ഞു കിട്ടിയ പ്രതികള്‍ ഇതുപയോഗിച്ച് ഇവരുടെ അക്കൗണ്ടില്‍ നിന്നു 39,000 രൂപ പിന്‍വലിക്കുകയായിരുന്നു. അക്കൗണ്ടില്‍ നിന്നു പണം പിന്‍വലിച്ച വിവരം സതീദേവിക്ക് മൊബൈലില്‍ സന്ദേശം ലഭിച്ചതോടെ ഇവര്‍ പൊലിസില്‍ പരാതി നല്‍കി. തുടര്‍ന്നു പൊലിസ് നടത്തിയ അന്വേഷണത്തില്‍ കാഞ്ഞങ്ങാട് നഗരത്തിലെ സിന്‍ഡിക്കറ്റ്, ഐ.ഒ.ബി, മാവുങ്കാലിലെ എസ്.ബി.ഐ എന്നീ ബാങ്കുകളിലെ എ.ടി.എം കൗണ്ടറുകളില്‍ നിന്നു പണം പിന്‍വലിച്ചതായി കണ്ടെത്തുകയും തുടര്‍ന്ന് എ.ടി.എം കൗണ്ടറുകളിലെ സി.സി ടിവി ദൃശ്യങ്ങള്‍ പരിശോധിച്ച് പ്രതികളെ കണ്ടെത്തുകയുമായിരുന്നു.12ന് പുലര്‍ച്ചെ 12 നും ഒന്നിനുമിടയിലാണു മൂന്നു കൗണ്ടറുകളില്‍ നിന്നുമായി ഇത്രയും തുക പിന്‍വലിച്ചത്.