സുല്‍ത്താന്‍ ബത്തേരി: ദലിത് യുവാവിനെ ഒരുകൂട്ടം ആളുകള്‍ ചേര്‍ന്ന് മര്‍ദിച്ചതായി പരാതി. ചെതലയം പുകലമാളം മൂന്ന് സെന്റ് കോളനിയിലെ മനോജ്(40)നാണ് മര്‍ദനമേറ്റത്. ഇക്കഴിഞ്ഞ ഞായറാഴ്ച രാത്രി 7.30യോടെ ജോലി കഴിഞ്ഞു വീട്ടിലേക്കു മടങ്ങുമ്പോഴാണ് മനോജിനെ ഒരു കൂട്ടം ആളുകള്‍ പുകലമാളത്തു വച്ച് മര്‍ദിച്ചതായി പറയുന്നത്.
ബസിറങ്ങി വീട്ടിലേക്കു നടക്കുന്നതിനിടെ പിന്നിലെത്തിയ സംഘം ബിയര്‍കുപ്പികൊണ്ട് തലയ്ക്കും മുഖത്തും അടിക്കുകയായിരുന്നു എന്നാണ് മനോജ് പറയുന്നത്. മര്‍ദനത്തില്‍ തലയിലും വായിലും സാരമായി മുറിവു സംഭവിച്ചിട്ടുണ്ട്. ബത്തേരി താലൂക്ക് ആശുപത്രിയില്‍ ചികില്‍സയിലാണ്. സംഭവത്തില്‍ ബത്തേരി പൊലിസ് കേസെടുത്തിട്ടുണ്ട്.