കോഴിക്കോട്: കാലിക്കറ്റ് സര്‍വകലാശാല കോളജ് യൂനിയന്‍ തെരഞ്ഞെടുപ്പില്‍ ജില്ലയില്‍ എസ്.എഫ്.ഐയ്ക്ക് ആധിപത്യം. കെ.എസ്.യു-എം.എസ്.എഫ് സഖ്യത്തെയും എ.ബി.വി.പി, എസ്.ഐ.ഒ ഉള്‍പ്പെടെയുള്ള മറ്റു വിദ്യാര്‍ഥി സംഘടനകളെയും പരാജയപ്പെടുത്തിയാണ് ജില്ലയില്‍ എസ്.എഫ്.ഐ മേധാവിത്വം നേടിയത്. കഴിഞ്ഞവര്‍ഷം വിജയിച്ച മുഴുവന്‍ കോളജുകളിലും യൂനിയന്‍ നിലനിര്‍ത്തിയ എസ്.എഫ്.ഐ പുതിയ കോളജുകളില്‍ ഭരണവും നേടി. ഭൂരിഭാഗം യൂനിവേഴ്‌സിറ്റി യൂനിയന്‍ കൗണ്‍സിലര്‍ സ്ഥാനങ്ങളും എസ്.എഫ്.ഐ സ്വന്തമാക്കി. അതേസമയം മലയോര മേഖലയില്‍ എം.എസ്.എഫ് സഖ്യത്തിനാണ് മേല്‍ക്കൈ.
നഗരത്തിലെ നാലു കോളജുകളിലും എസ്.എഫ്.ഐക്കാണ് ഭരണം. മീഞ്ചന്ത ഗവ. ആര്‍ട്‌സ് ആന്‍ഡ് സയന്‍സ് കോളജ്, മലബാര്‍ ക്രിസ്ത്യന്‍ കോളജ് എന്നിവിടങ്ങളില്‍ മുഴുവന്‍ ജനറല്‍ സീറ്റിലും അവര്‍ വിജയിച്ചു. ഗുരുവായൂരപ്പന്‍ കോളജില്‍ ഒന്‍പതില്‍ എട്ടു ജനറല്‍ സീറ്റിലും എസ്.എഫ്.ഐ വിജയിച്ചു. കോടഞ്ചേരി ഗവ. കോളജ്, ചേളന്നൂര്‍ എസ്.എന്‍ കോളജ്, പേരാമ്പ്ര സി.കെ.ജി കോളജ്, മടപ്പള്ളി ഗവ. കോളജ്, മൊകേരി ഗവ. കോളജ്, മുക്കം ഐ.എച്ച്.ആര്‍.ഡി കോളജ്, കൊടുവള്ളി ഗവ. കോളജ് എന്നിവിടങ്ങളില്‍ എസ്.എഫ്.ഐ മുഴുവന്‍ ജനറല്‍ സീറ്റിലും വിജയം നേടി. താമരരശ്ശേരി ഐ.എച്ച്.ആര്‍.ഡി കോളജില്‍ എട്ടില്‍ ഏഴുസീറ്റും വടകര മുക്കാളി സി.എസ്.ഐ കോളജില്‍ 15ല്‍ 13ഉം വടകര എസ്.എന്‍ കോളജില്‍ എട്ടു സീറ്റിലും വടകര എം.ഇ.എസില്‍ രണ്ടു സീറ്റിലും എസ്.എഫ്.ഐ വിജയിച്ചു. എട്ടു ജനറല്‍ സീറ്റുകള്‍ നേടി വടകര കോ-ഓപറേറ്റീവ് കോളജ് കെ.എസ്.യുവില്‍ നിന്ന് എസ്.എഫ്.ഐ പിടിച്ചെടുത്തു. മുക്കം എം.എ.എം.ഒ കോളജില്‍ എസ്.എഫ്.ഐ നാലു ജനറല്‍ സീറ്റുകളില്‍ വിജയിച്ചു.
മലയോര മേഖലയില്‍ എം.എസ്.എഫ് അധിപത്യം നിലനിര്‍ത്തി. എസ്.എം.ഐ കോളജ് വടകര, എസ്.എ കോളജ് ചേന്ദമംഗല്ലൂര്‍, എസ്.എസ് കോളജ് അരീക്കോട് എന്നിവിടങ്ങളില്‍ എം.എസ്.എഫ് തനിച്ച് മത്സരിച്ച് എസ്.എഫ്.ഐയില്‍ നിന്ന് യൂനിയന്‍ പിടിച്ചെടുത്തു. കെ.എം.ഒ കൊടുവള്ളി, നാഷനല്‍ കോളജ് പുളിയാവ്, ഇലാഹിയ്യ കൊയിലാണ്ടി, എം.ഇ.ടി നാദാപുരം, ഗോള്‍ഡന്‍ ഹില്‍സ് എളേറ്റില്‍, മലബാര്‍ മൂടാടി, എം.എച്ച്.ഇ.എസ് വടകര, എം.ഇ.എസ് വില്ല്യാപ്പള്ളി, ഐഡിയല്‍ കുറ്റ്യാടി, അല്‍ഫുര്‍ഖാന്‍ നാദാപുരം തുടങ്ങിയ കോളജുകളില്‍ എം.എസ്.എഫ് തനിച്ച് മത്സരിച്ച് യൂനിയന്‍ തൂത്തുവാരി. നാദാപുരം ഗവ. കോളജ്, സില്‍വര്‍ ആട്‌സ് കോളജ് പേരാമ്പ്ര തുടങ്ങിയ കോളജുകളില്‍ എം.എസ്.എഫ് മുന്നണിയായി യൂനിയന്‍ വിജയിച്ചു.
ജില്ലയില്‍ കെ.എസ്.യു നിലമെച്ചപ്പെടുത്തി. ആകെ 13 യു.യു.സിമാരാണ് കെ.എസ്.യുവിനുള്ളത്. നാദാപുരം ദാറുല്‍ ഹുദാ കോളജില്‍ കെ.എസ്.യു ഒറ്റയ്ക്ക് യൂനിയന്‍ നിലനിര്‍ത്തി. മുക്കം ഐ.എച്ച്.ആര്‍.ഡിയിലും ഗുരുവായൂരപ്പന്‍ കോളജില്‍ നിന്നും യു.യു.സി സീറ്റും കോഴിക്കോട് ഐ.എച്ച്.ആര്‍.ഡിയില്‍ ജനറല്‍ ക്യാപ്റ്റന്‍, ജോയിന്‍ സെക്രട്ടറി സീറ്റും തിരിച്ചുപിടിച്ചു.