മേപ്പയ്യൂര്‍: അനധികൃത മണലൂറ്റ് തടയാന്‍ ശ്രമിക്കുന്നതിനിടെ പൊലിസ് സംഘത്തിനു നേരെ മിനിലോറി കയറ്റി അപായപ്പെടുത്താന്‍ ശ്രമിച്ച സംഭവത്തില്‍ ഒരാളെ മേപ്പയ്യൂര്‍ പൊലിസ് അറസ്റ്റ് ചെയ്തു.
ആവള സ്വദേശി അബ്ദുല്ല (51) ആണ് പിടിയിലായത്. ലോറിയുടെ ചക്രം കാലില്‍കയറി സിവില്‍ പൊലിസ് ഓഫിസറായ സുനില്‍കുമാറിനു പരുക്കേറ്റിരുന്നു. തിങ്കളാഴ്ച രാത്രി 9.30നു ഗുളികപ്പുഴയിലെ മൂഴിക്കല്‍ കടവിലായിരുന്നു സംഭവം.
ചെറുവണ്ണൂര്‍ കക്കറമുക്കിലെ ഒരു വീട്ടുപറമ്പില്‍ കല്ലുവെട്ടുകുഴിയിലേക്കു ഇറക്കിവച്ച നിലയില്‍ മിനിലോറിയും പൊലിസ് കണ്ടെടുത്തു. ബുധനാഴ്ച പൊലിസ് നടത്തിയ തിരച്ചിലില്‍ അനധികൃതമായി ശേഖരിച്ച 15 ലോഡ് മണല്‍ പിടിച്ചെടുത്തു.
തുടര്‍നടപടിക്കായി റവന്യു ഉദ്യോഗസ്ഥര്‍ക്കു കൈമാറി. പയ്യോളി സര്‍ക്കിള്‍ ഇന്‍സ്‌പെക്ടറാണ് കേസന്വേഷിക്കുന്നത്. ചെറുവണ്ണൂര്‍ പഞ്ചായത്തിലെ മൂഴിക്കല്‍, പെരുഞ്ചേരി, നടേമ്മല്‍ എന്നീ കടവുകളില്‍ അനധികൃത മണലൂറ്റ് പതിവാണെന്ന് പരിസരവാസികള്‍ പറയുന്നു.