കൊച്ചി: വിജിലന്‍സ് ഡയറക്ടര്‍ ജേക്കബ് തോമസിനെതിരെ സര്‍വിസ് ചട്ട ലംഘനത്തിന് നടപടി വേണമെന്ന ഹരജി രാഷ്ട്രീയ പ്രേരിതമാണെന്നും ഇത്തരത്തിലുള്ള സര്‍വിസ് വിഷയങ്ങള്‍ പൊതു താല്‍പര്യ ഹര്‍ജിയിലൂടെ ചോദ്യം ചെയ്യാന്‍ ഹരജിക്കാരനു കഴിയില്ലെന്നും സര്‍ക്കാര്‍ ഹൈക്കോടതിയില്‍ അറിയിച്ചു.
ജേക്കബ് തോമസ് സര്‍ക്കാരിന്റെ അനുമതിയില്ലാതെ സ്വകാര്യ സ്ഥാപനത്തില്‍ അധ്യാപകനായി ജോലി ചെയ്തു പ്രതിഫലം കൈപ്പറ്റിയിട്ടുണ്ടെന്നും ഇതു ചട്ടലംഘനമാണെന്നും ആരോപിച്ച് കൂത്തുപറമ്പ് സ്വദേശി നരവൂര്‍ സത്യന്‍ നല്‍കിയ ഹരജിയിലാണ് സര്‍ക്കാര്‍ ഹൈക്കോടതിയില്‍ നിലപാട് വ്യക്തമാക്കിയത്.  ജേക്കബ് തോമസിന് നോട്ടീസ് നല്‍കണമോയെന്നതടക്കമുള്ള വിഷയങ്ങള്‍ പരിഗണിക്കാനായി സിംഗിള്‍ബെഞ്ച് ഹര്‍ജി മാറ്റി. കെ.ടി.ഡി.എഫ്.സിയുടെ എം.ഡിയായിരിക്കെ ജേക്കബ് തോമസ് ഗവേഷണ പ്രബന്ധം പൂര്‍ത്തിയാക്കാന്‍ ശമ്പളമില്ലാത്ത അവധിക്ക് അപേക്ഷ നല്‍കിയിരുന്നു. ഇതു ലഭിച്ചശേഷം ടി.കെ.എം ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റില്‍ സര്‍ക്കാരിന്റെ അനുമതിയില്ലാതെ പ്രതിഫലം വാങ്ങി ജോലി നോക്കി. ഇതു ചട്ടവിരുദ്ധമാണെന്ന് കണ്ടതോടെ വിജിലന്‍സ് അന്വേഷണത്തിന് ഉത്തരവിട്ടു. ജേക്കബ് തോമസിനു കാരണം കാണിക്കല്‍ നോട്ടീസും നല്‍കി. എന്നാല്‍ ശമ്പളമായി ലഭിച്ച തുക ജേക്കബ് തോമസ് സ്വകാര്യ സ്ഥാപനത്തിനു തിരിച്ചു നല്‍കി. ഇക്കാരണത്താല്‍ അദ്ദേഹത്തിനെതിരെ നടപടി വേണ്ടെന്ന നിലപാടാണ് സര്‍ക്കാര്‍ സ്വീകരിച്ചത്. ഈ വിഷയത്തില്‍ കൂടുതല്‍ നടപടി ആവശ്യമില്ലെന്ന് കേന്ദ്രസര്‍ക്കാരിനെയും  അറിയിച്ചിരുന്നു.